কাল কোৰোণাই মচিলে মুনুৰ সপোনবোৰ, পত্নীক সুখী কৰি পুত্ৰক মানুহ কৰাৰ বাবে গুজৰাটলৈ যোৱা বিৰাজ উভতি নাহিল, মোবাইলত পত্নীয়ে চালে স্বামীৰ অন্ত্যেষ্টিক্ৰিয়া

কাল মহামাৰী কোৰোণাই নিঃশেষ কৰিলে বোকাখাত বনগাঁৱৰ মুনু বৰাৰ সকলো সপোন৷ পত্নীক সুখী কৰি একমাত্ৰ পুত্ৰক মানুহ কৰাৰ বাবেই গুজৰাটৰ আহমেদাবাদৰ এটা কাফেটেৰীয়াৰ গুডাম ৰক্ষকৰ কামত নিয়োজিত হৈছিল বিৰাজ বৰা নামৰ লোকজন৷ কিন্তু কোভিড–১৯ত আক্ৰান্ত হৈ দুটা বছৰে পত্নী–পুত্ৰৰ মুখ নেদেখাকৈ ২১ এপ্ৰিলৰ নিশা ১০ বজাত মৃত্যুক আঁকোৱালি ল’লে ৪৫ বছৰীয়া বিৰাজ বৰাই৷

কাফেটেৰীয়াটোৰ মালিকৰ আত্মীয় যোৰহাটৰ জনৈক সিঙে এই কথা ফোনযোগে পত্নী মুনু বৰাক অৱগত কৰে৷ নলবাৰীৰ নিবাসী বিৰাজে বনগাঁৱৰ জীয়ৰী মুনু বৰাক বিয়া কৰোৱাৰ পিছত বনগাঁৱৰ পত্নীৰ ঘৰৰ কাষতেই মাটি কিনি নিগাজিকৈ থাকিবলৈ আৰম্ভ কৰিছিল৷ কিন্তু পুত্ৰক সুশিক্ষিত কৰাৰ বাবে পত্নী আৰু পুত্ৰক বোকাখাতৰ খ্ৰীষ্টজ্যোতি হাইস্কুলৰ সমীপৰ ভাড়াঘৰত ৰাখিছিল৷ প্ৰতি পুৱা, প্ৰতি সন্ধিয়া মোবাইলযোগে পত্নী–পুত্ৰৰ খবৰ ৰাখিছিল বিৰাজে৷

৪ বছৰ ধৰি গুজৰাটৰ ব্যক্তিগত খণ্ডত সেৱা আগবঢ়োৱা বিৰাজ ২০২০ বৰ্ষৰ কোৰোণাৰ ঢৌতো ঘৰলৈ অহা নাছিল৷ ব’হাগ বিহুৰ পিছতেই ঘৰলৈ অহাৰ পৰিকল্পনা কৰা বিৰাজ বৰা ১৩ এপ্ৰিলত কোভিড–১৯ত আক্ৰান্ত হোৱাত অহমেদাবাদৰ SSG হাস্পতালৰ কোভিড কেয়াৰ চেণ্টাৰত ভৰ্তি হয়৷ পৰৱৰ্তী সময়ত স্বাস্থ্যৰ অধিক অৱনতি হোৱাত তেওঁক ICUত ভৰ্তি কৰে৷ কিন্তু ICUত তেওঁ অন্তিম নিশ্বাস ত্যাগ কৰে৷

মৃত্যুৰ পিছত তেওঁৰ মৃতদেহ কলকাতাৰ দীপু চক্ৰৱৰ্তী নামৰ যুৱক এজনে চমজি লয়৷ পত্নীৰ অনুমতি লৈ তেজৰ সম্পৰ্ক নথকাকৈয়ে দীপুৱে কোভিড প্ৰটকল মানি পিপিই কীট পিন্ধি বিৰাজৰ মুখাগ্নি কৰে৷ শ্মশান কৰ্তৃপক্ষই বোকাখাতত থকা পত্নী মুনু বৰাক অন্ত্যেষ্টিক্ৰিয়াৰ সমগ্ৰ দৃশ্য মোবাইলযোগে প্ৰত্যক্ষ কৰায়৷ স্বামীহীনা মুনুৱে ভৱিষ্যতৰ কথা চিন্তা কৰি চকুলোৰে বাট নেদেখা হৈছে৷