একত্ৰিত হ’ব অসম জাতীয় পৰিষদ আৰু ৰাইজৰ দল! আঞ্চলিক শিবিৰৰ পৰা থাকিব এজনেই প্ৰাৰ্থী

একেলগ হ’ব সদৌ অসম ছাত্ৰ সন্থাৰ নেতৃত্বত গঠন হোৱা অসম জাতীয় পৰিষদ আৰু কৃষক মুক্তি সংগ্ৰাম সমিতি তথা বীৰ লাচিত সেনাৰ উদ্যোগত জন্ম হোৱা ৰাইজৰ দল। অহা নৱেম্বৰৰ মাহত আনুষ্ঠানিক সিদ্ধান্ত ল’ব দুয়োটা দলৰ ফালৰ পৰা। এই কথা সংবাদ মাধ্যমৰ আগত জনাইছে জগদীশ ভূঞাই। ভূঞাৰ মতে, ‘আগন্তুক নিৰ্বাচনৰ পূৰ্বে একত্ৰিত হ’বই লাগিব ৰাজ্যৰ আঞ্চলিক শক্তি। প্ৰতিটো সমষ্টিতে আঞ্চলিক শিৱিৰৰ পৰা থাকিব এজনেই প্ৰাৰ্থী।’ জগদীশ ভূঞাই লগতে কয় যে, ৰাষ্ট্ৰীয়তাবাদী শিৱিৰ আৰু সাম্প্ৰদায়িক শক্তিৰ বিৰুদ্ধে হ’ব আগন্তুক ২০২১ৰ যুঁজ।’

উল্লেখযোগ্য যে, ইয়াৰ পূৰ্বে অখিল গগৈয়ে বাৰে বাৰে সকলো আঞ্চলিক শক্তিক একেলগ হোৱাৰ আহ্বান জনাইছিল। এতিয়া জগদীশ ভূঞাই কোৱাৰ দৰে, কাৰ্যত এয়া যদি সম্ভৱ হৈ উঠে তেন্তে ই হৈ পৰিব বিজেপিৰ বাবে চিন্তাৰ কাৰণ।

জাতীয় পৰিষদৰ লগতে ৰাইজৰ দলৰ উজনি অসমত বিশেষ ভাবে থাকিব শক্তি, সেইদৰে বিজেপিৰো শক্তিৰ প্ৰাণকেন্দ্ৰ হ’ল উজনি অসম। তেনেস্থলত যদি জাতীয়তাবাদী শিবিৰৰ ভোট একেলগ হৈ যায়, তেন্তে ই বিজেপিৰ বাবে হৈ পৰিব বৃহত্‍ প্ৰত্যাহ্বান।