হিন্দু বাঙালীক চৰকাৰে প্ৰতাৰণা কৰাৰ অভিযোগ, শীঘ্ৰে ৰাজ্যত হিন্দু বাঙালীৰ নতুন ৰাজনৈতিক দল

ৰাজ্যৰ হিন্দু বাঙালী সকলৰ সমস্যা সমাধানৰ বাবে শীঘ্ৰেই গঠন হ’ব এটা নতুন ৰাজনৈতিক দল ৷ ২০২১ৰ নিৰ্বাচনত দলটোৱে প্ৰতিদ্বন্দিতাও আগবঢ়াব ৷ এই লক্ষ্যৰে ৰাজ্যৰ সকলো হিন্দু বাঙালী সংগঠনে একত্ৰিত হৈ শীঘ্ৰে অনুষ্ঠিত কৰিব জাতীয় অভিৱৰ্তন ৷ অহা ১০ আৰু ১১ অক্টোৱৰত ঢেকীয়াজুলিত সকলো হিন্দু বাঙালী সংগঠনৰ জাতীয় অভিৱৰ্তন অনুষ্ঠিত হ’ব ৷  হিন্দু বাঙালী সকলে নিজৰ সুৰক্ষিত ভৱিষ্যত আৰু অস্তিত্ব ৰক্ষাৰ বাবে গঠন কৰিব ৰাজনৈতিক দল ৷ ঢেকীয়াজুলিত এই কথা প্ৰকাশ কৰে সদৌ বাঙালী যুৱ -ছাত্ৰ ফেডাৰেছনৰ কেন্দ্ৰীয় সমিতিৰ সভাপতি দীপক দে’ই ৷

সদৌ বাঙালী ফেডাৰেছনৰ কেন্দ্ৰীয় সমিতিৰ সভাপতি দীপক দে’ৰ মুকলি প্ৰত্যাহ্বান চৰকাৰলৈ ৷ ‘একলাখ খিলঞ্জীয়া ভূমিহীনক সোণোৱাল চৰকাৰে মাটি পট্টা দিছে। যদি এক লাখৰ ভিতৰত এজনো যদি হিন্দু বাঙালী ভূমিহীনক চৰকাৰে মাটিৰ পট্টা দিছে তেনেহ’লে দেখুৱাই দিয়ক ৷ হিন্দু বাঙালী সকল অসমৰ খিলঞ্জীয়া নহয় নেকি ? যদি এজন হিন্দু বাঙালীক মাটিৰ পট্টা দিছে তেনেহ’লে বিজেপিৰ চৰকাৰে শ্বেতপত্ৰ প্ৰকাশ কৰক ৷ মুখ্যমন্ত্ৰীয়ে কেৱল মুখেৰে পাহৰ -ভৈয়াম বুলি ক’লে নহ’ব ৷’

সভাপতিজনে লগতে কয় যে, ‘৬ নং দফাৰ আমি কোনেও বিৰোধিতা কৰা নাই ৷ অসম চুক্তিৰ ৬ নং দফাত কোৱা হৈছে-অসমীয়া মানুহৰ ভাষা সংস্কৃতি,সাহিত্য,ঐতিহ্য আৰু সংৰক্ষণ কৰিব লাগে ৷আমিও অসম সন্তান অসমীয়া বুলি কবলৈ অলপো কৃপনালী নকৰো ৷ কিন্তু এইখন চৰকাৰ অহাৰ পিছত নতুনকৈ এক অসমীয়া জাতি, খিলঞ্জীয়া জাতি সৃষ্টি কৰিব বিচাৰিছে ৷ ১৯৮৫ৰ পিছৰ পৰা অসমীয়া -বাঙালীৰ মাজত সংঘাত আঁতৰিছিল। কিন্তু বিজেপিয়ে পুনৰ সংঘাত আৰম্ভ কৰিছে অসমীয়া-বাঙালীৰ মাজত ৷ সোণোৱাল চৰকাৰ হিন্দু বাঙালী বিৰোধী ৷’

একেদৰে সদৌ বিটিচি বাঙালী যুৱ ছাত্ৰ ফেডাৰেছনৰ মুখ্য উপদেষ্টা শ্যামল সৰকাৰে কয়-‘বৰাক -ব্ৰহ্মপু্ত্ৰ আৰু বিটিচিৰ বাঙালী সকলৰ সুৰক্ষিত ভৱিষ্যতকলৈ ৰাজনীতি দল গঠন কৰা হ’ব৷ হিন্দু বাঙালীৰ সকলো দল সংগঠনকে ধৰি নিস্পেষিত বহু জাতি-জনগোষ্ঠীয় সংগঠৰ সৈতে আলোচনা কৰি ৰাজনৈতিক অভিৱৰ্তনৰ জৰিয়তে অহা ১১অক্টোৱৰত ৰাজনৈতিক দলৰ নাম আনুষ্ঠানিক ভাবে ঘোষণা কৰি যিটো সমষ্টিত জয়ী হোৱাৰ সম্ভাৱনা আছে সেই সমষ্টিত প্ৰাৰ্থীত্ব দিয়া হ’ব ৷’

অসমীয়াত ব্ৰেকিং নিউজ সৰ্বপ্ৰথম News18 অসমীয়াত| শেহতীয়া খবৰ, লাইভ নিউজ আপডেট. সবাতোকৈ বিশ্বাসযোগ্য অসমীয়া নিউজ ৱেবছাইট News18 অসমীয়া|