ফেব্ৰুৱাৰী মাহত ঘোষণা কৰিব হাইস্কুল টেটৰ ফলাফল, ব’হাগ বিহুৰ পূৰ্বে পূৰণ কৰিব ২৩ হাজাৰ শিক্ষকৰ পদ

জনতা ভৱনত শিক্ষামন্ত্ৰী হিমন্ত বিশ্ব শৰ্মাৰ সংবাদমেল। সংবাদমেলত  বহু কেইটা গুৰুত্ব পূৰ্ণ সিদ্ধান্তৰ কথা ঘোষণা কৰে মন্ত্ৰী শৰ্মাই। লগতে ব’হাগ বিহুৰ আগতে ৰাজ্যত প্ৰায় ২৩ হাজাৰ শিক্ষকৰ পদ পূৰণ কৰাৰ কথা ঘোষণা কৰে হিন্ত বিশ্ব শৰ্মাই।

সংবাদমেলত শৰ্মাই কয় যে, ইতিমধ্যে প্ৰায় ৯,৯৩৫ টা উচ্চ আৰু নিম্ন প্ৰাথমিক বিদ্যালয়ৰ নিয়মীয়া শিক্ষক পদৰ বাবে বিজ্ঞাপন মুকলি কৰা ৰাজ্যৰ শিক্ষা বিভাগে অহা ৪৫ দিনৰ ভিতৰত আৰু প্ৰায় ৫ হাজাৰ শিক্ষক পদৰ বিজ্ঞাপন মুকলি কৰিব।

ইফালে হৈ যোৱা হাইস্কুল টেট পৰীক্ষাৰ ফলাফল অহা ফেব্ৰুৱাৰী মাহত ঘোষণা কৰা হ’ব বুলি জনাই মন্ত্ৰীগৰাকীয়ে। সেইদৰে ব’হাগ বিহুৰ আগতেই  হাইস্কুলৰো প্ৰায় ৬ হাজাৰ শিক্ষক পদ পূৰণ কৰিব ৰাজ্যৰ শিক্ষা বিভাগে। কিন্তু লক্ষ্য হ’ব ৮ হাজাৰ টা পদ পূৰণ।

যিসমূহ হাইস্কুলত মেট্ৰিক দিয়া ছাত্ৰ–ছাত্ৰীৰ সংখ্যা ১০ জনৰ তলত, সেই সমূহ বিদ্যালয়ক ওচৰৰ হাইস্কুলৰ লগত একত্ৰিকৰণ কৰা হ’ব বুলি জনাই মন্ত্ৰী শৰ্মাই।

ইয়াৰ উপৰিও অন্য কেতবোৰ ঘোষণা–

প্ৰাথমিক বিদ্যালয়ৰ ছাত্ৰ–ছাত্ৰীলৈ ৪ যোৰ ইউনিফৰ্ম যোগান ধৰিব শিক্ষা বিভাগে।

নৱম আৰু দশম শ্ৰেণীৰ ছাত্ৰ–ছাত্ৰীলৈও যোগান ধৰা হ’ব ইউনিফৰ্ম।

১৩,৩৬২ জন LP আৰু ME স্কুলৰ শিক্ষকৰ চাকৰি প্ৰাদেশীকৰণ।

৪,৯৯৩ খন বিদ্যালয় প্ৰাদেশীকৰণ কৰা হ’ব ব’হাগ বিহুৰ আগত।