Assam News: কান্দি উঠিল অৱনী লস্কৰৰ মাতৃ, U টাৰ্ণ আহিল বহুতৰে জীৱনলৈ

এটা চাকৰি ৷ এটা চাকৰিয়ে সলাই দিব পাৰে সকলো ৷ জীৱনে টাৰ্ণ লৈ ল’ব পাৰে এটা চাকৰি লাভৰ পিছত ৷ নিজৰ জীৱনৰ লগতে ঘৰখনৰ, গাঁওখনলৈও আশা কঢ়িয়াই একো একোটা চৰকাৰী চাকৰিয়ে ৷ প্ৰায় পঞ্চল্লিছ হাজাৰৰ নিযুক্তি মেলালৈ অহা সকলৰ অনুভৱবোৰ সুকীয়া ৷ অনুভৱৰ ছন্দত স্পন্দিত একো একোখন মুখ ৷ প্ৰাপ্তিৰ হাঁহিত মুখবোৰ জিলিকি উঠা দেখা গ'ল বৃহস্পতিবাৰৰ দিনটোত ৷

চাকৰি পাইছে নগাঁও কামপুৰৰ অৱনী লস্কৰে ৷ অৱনী পিতৃ হাৰা ৷ মাতৃয়ে অশেষ সংগ্ৰামৰে ডাঙৰ কৰিছে অৱনীক ৷ ১২ বছৰ পূৰ্বে অৱনী যেতিয়া ৯ বছৰীয়া আছিল তেতিয়াই হেৰুৱাইছিল পিতৃক ৷ পিতৃৰ সপোন আছিল অৱনী ডাঙৰ হৈ চাকৰি কৰিব, মাকৰ সাৰথি হ'ব ৷ অৱনীয়ে চাকৰি পোৱাত মাকৰ চকুত বিৰিঙিল পানী ৷ উচুপি উঠিল প্ৰাপ্তিৰ দিনটোতো। বহুতৰে তেনেকুৱা হৈছে কোনোবাখন ঘৰত তিনিটা পৰ্যন্ত চাকৰি হৈছে ৷ বাৰম্বাৰ চাকৰি বিচাৰি আবেদন কৰি হাৰি নোযোৱা গোলাঘাটৰ বাগানৰ বাসিন্দা মনোজ হঁতৰ তিনিওটাৰে চাকৰি হ'ল ৷

একেদৰে দিব্যাংগ বিকী ৰজক হঁতৰ মুখতো বিৰিঙিছে হাঁহি। কহৰাৰ তিলক বৰগোঁহাইৰ  কাহিনী সুকীয়া ৷ গৃহৰক্ষী বাহিনীত নিয়োজিত হৈ থকা তিলকৰ অসম আৰক্ষীত চাকৰি হ'ল। তিলকে গৃহৰক্ষী বাহিনীৰ জোৱান হৈ থকাৰ সময়তে বৰ্তমানৰ ৰাষ্ট্ৰপতি দ্ৰৌপদী মুৰ্মু আৰু প্ৰাক্তন ৰাষ্ট্ৰপতি ৰামনাথ কোবিন্দকো আপ্যায়নৰ আছে অনুভৱ ৷ আনকি চাকৰিৰ বাবে ইণ্টাৰভিউ দিবলৈ আহোঁতে হোৱা স্কুটী দুৰ্ঘটনাৰ কথাও ব্যক্ত কৰিলে তিলকে ৷

সকলোৰে সুকীয়া অনুভৱৰ ছন্দৰ স্পন্দিত হৈ ৰ'ল খানাপাৰা পশু চিকিৎসা মহাবিদ্যালয় খেলপথাৰ ৷ নতুনকৈ নিযুক্তি পোৱা জয়ন্ত চাংমায়ে ক'লে, 'হতাশ হ'ব নালাগে ৷ আশা এৰিব নালাগে ৷ আজি নাই হোৱা কাইলৈ হ'ব ৷'

অসমীয়াত ব্ৰেকিং নিউজ সৰ্বপ্ৰথম News18 অসমত। শেহতীয়া খবৰ, লাইভ নিউজ আপডেট, সবাতোকৈ বিশ্বাসযোগ্য অসমীয়া নিউজ ৱেবছাইট News18 অসম।