Boomba Ride : দোকানৰ সামগ্ৰী আনিবলৈ গৈ দেৰগাঁৱৰ শিশুৱে পালে ফ্ৰান্স! কাঁ চলচ্চিত্ৰ মহোৎসৱত অসমৰ ছবি ‘বুম্বা ৰাইড'

ফ্ৰান্সৰ বিখ্যাত কাঁ চলচ্চিত্ৰ মহোৎসৱৰ ভিন্ন শাখাত অসমৰ ছবি ‘বুম্বা ৰাইড' যোৱা ২২ মে'ত প্রদর্শিত হয়। অসমৰ চলচ্চিত্ৰ উদ্যোগৰ লগতে ৰাজ্যখনৰ বাবে গৌৰৱ কঢ়িয়াই অনা ‘বুম্বা ৰাইড'ৰ প্ৰযোজক লুইত কুমাৰ বৰ্মন (Producer Luit Kumar Barman) আৰু পৰিচালক বিশ্বজিত বৰা (Director Biswajit Bora)। ভাৰত চৰকাৰে এই শিতানত প্ৰদৰ্শনৰ বাবে নিৰ্বাচন কৰা পাঁচখন আঞ্চলিক ভাষাৰ ভাৰতীয় ছবিৰ ভিতৰত স্থান পাইছিল বুম্বা ৰাইডে।

২২ মে'ত কান চলচ্চিত্র মহোৎসৱৰ মূল ছবিঘৰ ‘অলিম্পিয়া থিয়েটাৰ'ত 'বুম্বা ৰাইড’ (Boomba Ride) প্রদর্শন কৰিবলৈ নির্বাচিত কৰিছিল কেন্দ্রীয় চৰকাৰৰ চলচ্চিত্র মহোৎসৱ সঞ্চালকালয়ে। সেই অনুসৰি ভাৰত চৰকাৰৰ পৃষ্ঠপোষকতাত চলচ্চিত্ৰখন প্ৰদৰ্শিত হয়।

চলচ্চিত্ৰখনৰ এই কৃতিত্ব সন্দৰ্ভত পৰিচালক বিশ্বজিত বৰাই কয়- ''কাঁ চলচ্চিত্ৰ মহোৎসৱত (Cannes Film Festival) আমাৰ ছবিখন প্ৰদৰ্শন কৰাৰ এই সুন্দৰ সুযোগ দিয়াৰ বাবে মই ভাৰত চৰকাৰ, এন এফ ডি চি আৰু কাঁৰ প্ৰতি কৃতজ্ঞ। মই অতি আশাবাদী যে ছবিখনক বিতৰক, প্ৰদৰ্শক আৰু দৰ্শকে আদৰি ল’ব।''

তেওঁ লগতে ভাৰত চৰকাৰে প্ৰদৰ্শনৰ বাবে যাৱতীয় খৰচৰ এটা ডাঙৰ অংশ যেনে ভিছা প্ৰচেছিং, আঞ্চলিক চিনেমাৰ প্ৰচাৰৰ বাবে চেমিনাৰ অনুষ্ঠিত কৰা, অডিটৰিয়াম বুকিং কৰা, লজিং আদিৰ ব্যৱস্থা কৰি দিয়াত শলাগ লয়।

উল্লেখ্য, মাত্ৰ ১২-১৩ লাখ টকাৰ বাজেটৰ এই ছবিখন শ্বুটিঙৰ বাবে সময় লৈছিল এমাহতকৈও কম। ''গড অন দ্য বেলকনি'' ছবিৰ জৰিয়তে খ্যাতি অৰ্জন কৰা বিশ্বজিত বৰা পৰিচালিত ''বুম্বা ৰাইড'' ছবিখনৰ মূল ভূমিকাত অভিনয় কৰিছে শিশু অভিনেতা ইন্দ্ৰজিত পেগুৱে।

''বুম্বা ৰাইড'' অসমৰ গ্ৰামাঞ্চলৰ বিদ্যালয়সমূহৰ দুৰাৱস্থাৰ ওপৰত এক আলোকপাত। শিশু শিল্পী ইন্দ্ৰজিৎ পেগুৱে চিত্ৰিত কৰা বুম্বা চৰিত্ৰটো চৰকাৰী বিদ্যালয়ৰ ছাত্ৰৰ। ইয়াৰ মাধ্যমেৰে স্কুলৰ শিক্ষক, কৰ্মচাৰীৰ জীৱন, আমাৰ শিক্ষা ব্যৱস্থা, শিক্ষাস্থলীৰ দুৰ্নীতি আদি প্ৰতিফলিত কৰা হৈছে।

মিচিং সম্প্ৰদায়ৰ লোকে বসবাস কৰা অঞ্চলৰ বাসিন্দাসকলৰ সৈতে সময় কটায় ছবি নিৰ্মাতাগৰাকীয়ে সম্পূৰ্ণ অপেছাদাৰী অভিনেতা-অভিনেত্ৰীৰ দ্বাৰা এই চলচ্চিত্ৰ নিৰ্মাণ কৰিছিল। শিশু অভিনেতা ইন্দ্ৰজিত পেগুকো (Indrajit Pegu) বিচাৰি পাইছিল দোকানৰ সামগ্ৰী আনিবলৈ যোৱাৰ সময়ত। ইন্দ্ৰজিত পেগু দেৰগাঁৱৰ বৰমুকলি গাঁৱৰ বাসিন্দা। বিশ্বজিত বৰাই এগৰাকী সুদক্ষ পৰিচালকৰ পৰিচয় দি শিশুগৰাকীকে বুম্বাৰ চৰিত্ৰত অভিনয় কৰিবলৈ দি তেওঁৰ প্ৰতিভাৰ উন্মেষ ঘটাইছিল।

পৰিচালক বৰাই কয়- ''স্বাধীন চলচ্চিত্ৰ নিৰ্মাতা হিচাপে আমি আমাৰ ছবিসমূহ দৰ্শকক দেখুৱাব বিচাৰোঁ, কিন্তু আমাৰ হাতত মঞ্চ নাই …আমাক এই সুযোগ প্ৰদান কৰি ভাৰত চৰকাৰে এটা ডাঙৰ কাম কৰিলে।''

উল্লেখ্য, এই ছবিখনে কাঁ চলচ্চিত্ৰ মহোৎসৱৰ ভিন্ন শাখাত প্ৰদৰ্শনৰ বাবে নিৰ্বাচন হোৱাৰ পিছতো এই চলচ্চিত্ৰখনক লৈ অসম চৰকাৰে পালন কৰা ভূমিকাক লৈ বিতৰ্কৰ সৃষ্টি হৈছিল।