নতুন স্বাস্থ্য মন্ত্ৰীয়ে দায়িত্বভাৰ লোৱাৰ দিনাই ৰাজ্যত বৃদ্ধি পাইছে ক'ভিড আক্ৰান্তৰ সংখ্যা, কাইলৈ দিয়া হ'ব নতুন নীতি-নিৰ্দেশনা।

মন্ত্ৰী হিমন্ত বিশ্ব শৰ্মাৰ মন্ত্ৰীসভাত মিত্ৰজোঁটৰ দল অগপৰ কেশৱ মহন্তক দিয়া হৈছে স্বাস্থ্য বিভাগৰ গধুৰ দায়িত্ব। আজি মন্ত্ৰীগৰাকীয়ে এই দপ্তৰ লাভ কৰাৰ দিনটোতে  অসমত আক্ৰান্তৰ সংখ্যাই পাৰ কৰিলে ৬ সহস্ৰাধিকৰ ঘৰ। দিনটোত ৬৮,৫৭২ জন লোকৰ ক'ভিড পৰীক্ষা সম্পন্ন কৰা হৈছিল। ইয়াৰে আক্ৰান্ত হৈছে ৬,২৫৮ জন।

তেনে পৰিস্থিতিত সংবাদমেল যোগে কাইলৈ দিনত নতুন নীতি-নিৰ্দেশনা প্ৰকাশ কৰা হ'ব বুলি জনায় নৱ নিযুক্ত স্বাস্থ্য মন্ত্ৰীগৰাকীয়ে। আজি কেবিনেট বৈঠকতো ক'ভিড সন্দৰ্ভত কেতবোৰ সিদ্ধান্ত লোৱাৰ কথা অৱগত কৰে স্বাস্থ্য মন্ত্ৰী কেশৱ মহন্তই।

মঙলবাৰে ৰাজ্যখনত আক্ৰান্তৰ হাৰ হৈছে ৯.১৩ শতাংশ। আনহাতে যোৱা ২৪ ঘণ্টাত ক'ভিডৰ সৈতে যুঁজত প্ৰাণ হেৰুৱালে ৮৫জনে। দিনটোত সৰ্বাধিক আক্ৰান্ত হয় কামৰূপ মহানগৰ জিলাত। তেনে পৰিস্থিতিত পৰৱৰ্তী সময়ত নতুন স্বাস্থ্য মন্ত্ৰীগৰাকীয়ে কি ভূমিকা লয় সেয়া হ'ব লক্ষণীয়।