ডিজিটেল ব্যৱস্থাপনাৰে আজিৰে পৰা অসম বিধানসভাৰ বাজেট অধিৱেশন, গো-সুৰক্ষা বিধেয়ক উত্থাপনৰ সম্ভাৱনা...

আজিৰে পৰা ১৩ আগষ্ট পৰ্যন্ত চলিবলগীয়া পোন্ধৰ সংখ্যক অসম বিধানসভাৰ প্ৰথমখন বাজেট অধিৱেশনৰ বাবে সাজু সকলো শাসক-বিৰোধী বিধায়ক ৷ মুঠ তেৰখন বিধেয়ক এইবাৰৰ বাজেট অধিৱেশনত উত্থাপিত হ'ব বুলি জনায় অধ্যক্ষ বিশ্বজিত দৈমাৰীয়ে ৷

সকলো দিশৰ পৰা এতিয়া সাজু অসম বিধানসভাৰ সচিবালয় ৷ আজিৰে পৰা আৰম্ভ হ'বলগীয়া পোন্ধৰ সংখ্যক অসম বিধানসভাৰ প্ৰথমখন বাজেট অধিৱেশনৰ বাবে সজাই পৰাই তোলা হৈছে বিধানসভাৰ চৌহদ, সদনৰ ভিতৰ চ'ৰা আৰু বিধানসভাৰ সচিবালয় ৷ চৌহদৰ দেৱালত ৰাজ্যৰ সকলো জাতি-জনগোষ্ঠীৰ জীৱনৰ প্ৰতিছৱি পেইণ্টিং কৰি দিয়াৰ লগতে চৌহদৰ বাহিৰে ভিতৰে বিভিন্ন ফুলৰ টাৱেৰে সজাই সৰ্বাংগসুন্দৰ কৰি তোলা হৈছে ৷

পুৱা ৯:৩০ বজাৰ পৰা আৰম্ভ হ'ব অধিৱেশন ৷ ইয়াৰ পূৰ্বে দেওবাৰে অধ্যক্ষ বিশ্বজিত দৈমাৰীয়ে সাংবাদিকক জনায় এইবাৰৰ অধিৱেশনৰ বাবে সকলো বিধায়কৰ বাবে দিয়া হৈছে ডিজিটেল পৰিচয় পত্ৰ ৷ আমোলা-বিষয়াৰ পৰা আৰম্ভ কৰি সাংবাদিক পৰ্যন্ত সকলোকে দিয়া হৈছে ডিজিটেল পৰিচয় পত্ৰ ৷

এইবাৰৰ অধিৱেশনত তেৰখন বিধেয়ক উত্থাপন কৰিব চৰকাৰে ৷ বেচৰকাৰী বিধেয়কো উত্থাপন হ'ব সদনত ৷

তেৰ আগষ্ট পৰ্যন্ত চলিবলগীয়া বাজেট অধিৱেশনত বহু চৰ্চিত গো-সুৰক্ষা বিধেয়কখনো উত্থাপন কৰিব ড° হিমন্ত বিশ্ব শৰ্মাৰ চৰকাৰে ৷ লগতে ব্যাপকভাৱে চৰ্চাত থকা জনসংখ্যা নীতি সম্পৰ্কীয় নতুন বিধেয়কখনো এইবাৰৰ বাজেট অধিৱেশনত চৰকাৰে উত্থাপন কৰিব ৷ ইয়াৰ বাবে বিৰোধীয়ে হুলস্থূলীয়া পৰিৱেশৰ সূচনা কৰাৰ পূৰ্ণ সম্ভৱনা আছে ৷

ডিজিটেল ব্যৱস্থাৰে আৰম্ভ হ'বলগীয়া বাজেট অধিৱেশনত বিধায়ক সকলে লেপটপ ব্যৱহাৰ কৰিব পাৰিব ৷ মোবাইল ফোন সদনৰ ভিতৰলৈ নিব পাৰিব যদিও মোবাইলত নেটৱৰ্ক নাপাব কোনেও ৷  উল্লেখযোগ্য যে ১৬ জুলাইত সদনত বাজেট দাখিল কৰিব ৰাজ্যৰ প্ৰথমগৰাকী মহিলা বিত্ত মন্ত্ৰী অজন্তা নেওগে ৷