'অসম চুক্তি ৰূপায়ণত সৰ্বোচ্চ অগ্ৰাধিকাৰ দিয়া হ'ব, মুখ্যমন্ত্ৰীয়ে গুৰুত্ব সহকাৰে লৈছে'- ১৯৮৫ চনৰ পিছত প্ৰথমবাৰলৈ শ্বহীদ ন্যাসত উপস্থিত হ'ল অসম চুক্তি ৰূপায়ণ মন্ত্ৰী

১৯৮৫ চনৰ পিছত প্ৰথমবাৰলৈ শ্বহীদ ন্যাসত উপস্থিত হ'ল অসম চুক্তি ৰূপায়ণ মন্ত্ৰী। অসম চুক্তি ৰূপায়ণৰ সন্দৰ্ভত সদৌ অসম ছাত্ৰ সন্থাৰ নেতৃত্বৰ সৈতে দীঘলীয়া আলোচনাত মিলিত হ'ল অসম চুক্তি ৰূপায়ণ বিভাগৰ মন্ত্ৰী অতুল বৰা।

প্ৰায় দুটা ঘণ্টাজোৰা বৈঠকৰ পিছত মন্ত্ৰী অতুল বৰাই কয় যে, 'ৰাজনৈতিক সদিচ্ছা প্ৰকাশ কৰিছে চৰকাৰখনে। সৰ্বোচ্চ অগ্ৰাধিকাৰ দিয়া বিষয় হৈছে অসম চুক্তি ৰূপায়ন। মুখ্যমন্ত্ৰী হিমন্ত বিশ্ব শৰ্মাই বহু আগ্ৰহেৰে লৈছে এই বিষয়টো। শ্বহীদ ন্যাসৰ সৈতে মোৰ বহু স্মৃতি জড়িত হৈ আছে। যিহেতু মই এইখন মজিয়াৰ পৰাই গৈছো। অসমৰ জনসাধাৰণৰ কেইবা দশকৰ আশা পূৰণৰ বাবে আমি আগবঢ়াইছো। আছুৰ সহযোগিতাত আমি এই কাম কৰিব লাগিব।'

কিন্তু অসম চুক্তিৰ ৬ নং দফাৰ সন্দৰ্ভত কোনো আলোচনা কৰা নাই মন্ত্ৰী অতুল বৰাই।পৰ্য্যায়ক্ৰমে এই সন্দৰ্ভত আলোচনা কৰাৰ আশ্বাসহে দিছে মন্ত্ৰীগৰাকীয়ে। ৰাজনৈতিক আৰু অৰ্থনৈতিক সুৰক্ষাৰ সন্দৰ্ভতো মন্তব্য নকৰিলে মন্ত্ৰী গৰাকীয়ে।

এই সন্দৰ্ভত আছুৰ মুখ্য উপদেষ্টা সমুজ্জ্বল কুমাৰ ভট্টাচাৰ্যই কয় যে, 'এসময়ত তেওঁৱেই স্মাৰক পত্ৰ প্ৰেৰণ কৰিছিল আৰু আজি তেওঁ স্মাৰক পত্ৰ ল'ব পৰা হ'ল। তাৰ পিছত তেওঁ ইয়ালৈ অহাৰ বাবে ধন্যবাদ। কোনো মন্ত্ৰীয়েই পূৰ্বে ইয়ালৈ অহা নাছিল। প্ৰথমবাৰৰ বাবে অসম চুক্তি ৰূপায়ণ বিভাগৰ মন্ত্ৰী আহিছে, আদৰণি জনাইছো। অসম চুক্তি ৰূপায়ণ কৰাটোৱেই মূল বিষয়। আজিৰ আলোচনা অনানুষ্ঠানিক, ইয়াৰ পিছত অনুষ্ঠানিকতা দেখিবলৈ পাম বুলি আশা কৰিছো।' ৬ নং দফা, ৭নং দফা, কাগজ কল সকলো কথাই গুৰুত্বপূৰ্ণ। ইতিবাচক সিদ্ধান্ত লোৱা হ'ব বুলি অতুল বৰাই কৈছে। আমাক লাগে ফলাফল। অসম চুক্তিৰ প্ৰত্যেকটো দফা সময়ৰ ভিতৰত ৰূপায়ণ কৰা হ'ব বুলি ভাবিছো।'

সভাপতি দীপাংক নাথে কয় যে 'আমি আশা কৰিছো। কিন্তু কাৰ্যকৰী হোৱাৰ পিছতহে আমি আশ্বস্ত হ'ব পাৰিম। অসম চুক্তিৰ কেইবাটাও দফা আগবাঢ়িছে যদিও সম্পূৰ্ণ হোৱা নাই। অতুল বৰাই আগবঢ়াই নিব বুলি ভাবিছো।'