Foundation Day of AGP : অসম গণ পৰিষদ দলৰ ৩৮সংখ্যক প্ৰতিষ্ঠা দিৱসৰ লাইখুঁটা স্থাপন

অসম গণ পৰিষদ দলৰ  অহা ১৪ অক্টোবৰত  হ'বলগীয়া ৩৮সংখ্যক প্ৰতিষ্ঠা দিৱসৰ লাইখুঁটা আজি বৰপেটা জিলা ক্ৰীড়া সন্থাৰ খেল পথাৰত স্হাপন কৰা হয় ৷ বঙাইগাঁও সমষ্টিৰ বিধায়ক ফণীভূষণ চৌধুৰী, বৰপেটাৰ প্ৰাক্তন বিধায়ক গুণীন্দ্ৰ নাথ দাস, অগপৰ কেন্দ্ৰীয় সমিতিৰ উপ-সভাপতি ডাঃ তাৰা প্ৰসাদ দাস, প্ৰাক্তন বিধায়ক ভুপেন ৰয়ৰ উপস্থিতিত লাইখুঁটা স্থাপন কৰে বৰপেটা সত্ৰৰ ডেকা সত্ৰীয়া গৌতম পাঠকে ৷

বৰপেটা সমষ্টিৰ প্ৰাক্তন বিধায়ক তথা বৰপেটা জিলা অগপৰ সভাপতি গুণীন্দ্ৰ নাথ দাসে সংবাদ মাধ্যমক জানিবলৈ দিয়ে যে প্ৰতিষ্ঠা দিৱসত  ৫০ হাজাৰৰ পৰা ১ লাখ লোকৰ সমাগম হ'ব ৷ অগপৰ এই প্ৰতিষ্ঠা দিৱসৰ পৰাই নামনি অসমৰ ৪০খন বিধানসভাকে শক্তিশালী কৰি তুলিব ৷

আগন্তুক দিনত অগপই অসমত ভালকৈ খোপনি পুতিব পাৰিব বুলি আশা ব্যক্ত কৰে ৷ অসম গণ পৰিষদ দল শক্তিশালী হ'লেহে অসমৰ উন্নয়ন হ'ব বুলিও প্ৰাক্তন বিধায়কগৰাকীয়ে মন্তব্য কৰে ৷

ৰাষ্ট্ৰীয়তাবাদী দলতকৈ জাতীয়তাবাদী দল বেছি শক্তিশালী হ'লে অসমৰ জনসাধাৰণৰ ভাব-আৱেগ, দুখ-বেদনা আঞ্চলিক দলে ভালদৰে বুজি পায় আৰু কথা কোৱাৰ সুবিধা থাকে বুলি উল্লেখ কৰে ৷ আঞ্চলিকতাবাদেহে অসমৰ সমস্যা সমাধান কৰিব পাৰিব বুলি প্ৰাক্তন বিধায়কগৰাকীয়ে মন্তব্য কৰে ৷

আগন্তুক ২০২৪ৰ লোকসভাত মিত্ৰজোঁট ভাৰতীয় জনতা পাৰ্টীয়ে বৰপেটা লোকসভা সমষ্টিটো অগপক এৰি দিব বুলি আশাবাদী বৰপেটাৰ প্ৰাক্তন বিধায়ক গুণীন্দ্ৰ নাথ দাস ৷

অসমীয়াত ব্ৰেকিং নিউজ সৰ্বপ্ৰথম News18 অসমত। শেহতীয়া খবৰ, লাইভ নিউজ আপডেট, সবাতোকৈ বিশ্বাসযোগ্য অসমীয়া নিউজ ৱেবছাইট News18 অসম।