গুৱাহাটীৰ আৰ্য হাস্পতালৰ বিশেষ সাফল্য, হাতীৰ আক্ৰমণত লাওখোলা দুফাল হোৱা লোকক দিলে নতুন জীৱন

২৬ জুলাইত নগাঁও জিলাৰ লাওখোৱা বনাঞ্চলৰ সমীপত বনৰীয়া হাতীৰ আক্ৰমণত গুৰুতৰভাৱে আঘাতপ্ৰাপ্ত হৈছিল আশ্বিনী মণ্ডল নামৰ লোকজন৷ হাতীৰ আক্ৰমণত মণ্ডলৰ মূৰৰ আগফাল দুফাল হোৱাৰ লগতে এৰাই গৈছিল ছাল৷ হাতীৰ আক্ৰমণৰ পিছতে মণ্ডলক লৈ যোৱা হৈছিল লাওখোৱা স্বাস্থ্য কেন্দ্ৰলৈ। কিন্তু তাত চিকিৎসকে উন্নত চিকিৎসাৰ বাবে গুৱাহাটীলৈ নিয়াৰ পৰামৰ্শ দিয়ে৷

বন বিভাগৰ লোকে মণ্ডলৰ চিকিৎসাৰ বাবে যোগাযোগ কৰে গুৱাহাটীৰ আৰ্য চিকিৎসালয়ৰ সৈতে৷ বন বিভাগৰ লোকে ২৬ জুলাইৰ সন্ধিয়া ভৰ্তি কৰে আৰ্য হাস্পতালত৷ চিকিৎসালয়খনৰ তিনিজনীয়া চিকিৎসকৰ দল ক্ৰমে ডাঃ অভিজৎ নেওগ, ডাঃ ৰাজীব বৰা আৰু বুলেন ফুকনে আৰম্ভ কৰে মণ্ডলৰ চিকিৎসা৷ কেইবাঘণ্টা জুৰি কৰা অস্ত্ৰোপ্ৰচাৰৰ অন্তত মণ্ডলৰ লাওখোলা জোৰা লগাবলৈ সক্ষম হয়৷

আনহাতে, মণ্ডলৰ চিকিৎসাৰ খৰচো বহন কৰিছে চিকিৎসালয়খনে৷ অকল দৰবৰ বাবে ৫৫০০ টকাহে বহন কৰিব লাগিব অশ্বিনী মণ্ডলৰ পৰিয়ালে৷ "অতি কঠিন আছিল মণ্ডলৰ চিকিৎসা৷ কাৰণ লাওখোৱা দুফাল হোৱাৰ ওপৰি মূৰৰ ছাল এৰাই গৈছিল চকু পৰ্যন্ত৷ বন বিভাগৰ অনুৰোধত আমি তিনিজনীয়া চিকিৎসকৰ দলে চিকিৎসালয়ত ভৰ্তি হোৱাৰ লগে লগে আৰম্ভ কৰিছিলো চিকিৎসা৷ আৰু কেইবাঘণ্টা জুৰি কৰা অস্ত্ৰোপ্ৰচাৰৰ অন্তত সফলতাৰে আমি সুস্থ কৰিব পাৰিলো।" – ক’লে অস্ত্ৰোপ্ৰচাৰ সফলতাৰে সম্পাদন কৰা ডাঃ অভিজিৎ নেওগে।