চাকৰি ঘূৰাই নাপায় ৪৩ ৰাজপত্ৰিত বিষয়াই, ৩ কোটিৰে উচ্চতম ন্যায়ালয়ৰ অধিবক্তা আনিলে ৰাজ্য চৰকাৰে

এ পি এছ চি কেলেংকাৰীত গ্ৰেপ্তাৰ হোৱা ৪৩ ৰাজপত্ৰিত বিষয়াই চাকৰি ঘূৰাই বিচাৰি গুৱাহাটী উচ্চ ন্যায়ালয়ত জনোৱা আবেদনৰ শুনানি সম্পন্ন। আজি উচ্চ ন্যায়ালয়ত সম্পন্ন হয় প্ৰথমটো শুনানি। ন্যায়ালয়ে সকাহ নিদিলে নামকটা ৰাজপত্ৰিত বিষয়াসকলক। অহা ৩০ জুলাইত পুনৰ শুনানি গ্ৰহণ কৰিব ন্যায়ালয়ে।

ৰাজ্য চৰকাৰৰ হৈ যুক্তি প্ৰদৰ্শন উচ্চতম ন্যায়ালয়ৰ জ্যেষ্ঠ অধিবক্তা মনিন্দৰ সিং আৰু নলীন এছ কোহলীয়ে। উচ্চতম ন্যায়ালয়ৰ পূৰ্বৰ নিৰ্দেশনামৰ্মে কোনো কাৰণতে এই ৰাজপত্ৰিত বিষয়াসকলে চাকৰি ঘূৰাই নাপায় বুলি মন্তব্য কৰে অধিবক্তা কোহলীয়ে।

উল্লেখযোগ্য যে অসম চৰকাৰে উচ্চতম ন্যায়ালয়ৰ অধিবক্তা মনিন্দৰ সিঙক APSC গোচৰৰ ওকালতি কৰাৰ বাবে দিবলগীয়া হৈছে ৩ কোটি টকা।

উল্লেখযোগ্য যে ৰাকেশ পাল এণ্ড কোম্পানীৰ পৰা ধনৰ বিনিময়ত APSCৰ চাকৰি কিনিছিল এই এইসকল নামকটা ৰাজপত্ৰিত বিষয়াই। পৰৱৰ্তী পৰ্যায়ত এজন এজনকৈ জালত পৰিছিল অসম লোকসেৱা আয়োগৰ কলংকিত অধ্যক্ষ ৰাকেশ পালসহ ৭০জনকৈ ৰাজপত্ৰিত বিষয়া–কৰ্মচাৰী।

অসম লোকসেৱা আয়োগৰ অধ্যক্ষ হৈ থকাৰ সময়ত চাকৰিৰ বজাৰ মেলিছিল ৰাকেশ পালে। মেধাৱী প্ৰাৰ্থীক বঞ্চিত কৰি কেৱল টকাৰ বাবেই ৰাকেশ পালে সংঘটিত কৰিছিল এই বিয়াগোম কেলেংকাৰী। লাখ লাখ টকাৰ বিনিময়ত ৰাকেশ পালৰ পৰা চাকৰি ক্ৰয় কৰিছিল এইসকল অভিযুক্তই। এই কেলেংকাৰী পোহৰলৈ অহাৰ পিছতে বিশেষ তৎপৰতা গ্ৰহণ কৰিছিল ৰাজ্য চৰকাৰে। জালত পৰিছিল ইজনৰ পিছত সিজন অভিযুক্ত।