APCC Protest | Rajiv Bhawan: প্ৰতিবাদত উত্তাল ৰাজীৱ ভৱন! অসমৰ মাটি মেঘালয়ক হস্তান্তৰৰ একপক্ষীয় সিদ্ধান্তৰ বিৰোধিতাত প্ৰতিবাদ কংগ্ৰেছৰ

বিৰোধীক গুৰুত্বহীন কৰি মেঘালয়ক মাটি দিব অসম চৰকাৰে ৷ মুখ্যমন্ত্ৰীৰ নিজ সিদ্ধান্তৰ বিৰুদ্ধে ক্ষোভ অসম প্ৰদেশ কংগ্ৰেছ কমিটিৰ ৷ কমিটিৰ সভাপতি ভূপেন বৰাই কয়- এয়া কেতিয়াও সহজভাৱে ল'ব নোৱাৰি ৷ বিৰোধী কংগ্ৰেছে সৰ্বদলীয় বৈঠকত বিধানসভাত সবিস্তাৰে আলোচনাৰ দাবী তুলিছিল ৷ কিন্তু কংগ্ৰেছৰ এই দাবীৰ পৰিৱৰ্তে মুখ্যমন্ত্ৰীয়ে নিদিলে কোনো সঁহাৰি ৷

প্ৰদেশ কংগ্ৰেছৰ মতে, নিজৰ স্থিতিত অটল মুখ্যমন্ত্ৰী হিমন্ত বিশ্ব শৰ্মাই পিলিংকাটা, বকোকে ধৰি বহু অঞ্চল এৰি দিবলৈ সাজু ৷ মুখ্যমন্ত্ৰীৰ এনে স্থিতি থাকিলে বিজেপি চৰকাৰৰ দিনত অসমে হেৰুৱাব লাগিব ৪৫ লাখ বিঘা ভূমি ৷ কিয়নো চুবুৰীয়া ৰাজ্যৰ দখলত আছে অসমৰ ৪৫ লাখ ভূমি ৷

মুখ্যমন্ত্ৰী হিমন্ত বিশ্ব শৰ্মা ভূমি ওভতাই অনাৰ পৰিৱৰ্তে গতোৱাত সিদ্ধহস্ত বুলিও অভিযোগ কৰে  অসম প্ৰদেশ কংগ্ৰেছ কমিটিৰ সভাপতি ভূপেন বৰাই ৷ সংগ্ৰামৰ এক বিন্দু তেজ থকা প্ৰতিগৰাকী বিজেপি নেতা কৰ্মীক ওলাই অহাৰ আহ্বান জনায় ভূপেন বৰাই ৷ তেওঁ বিজেপি কৰ্মীক পিলিং কাটালৈ যোৱাৰ আহ্বান জনায়।

 উল্লেখ্য, চৰকাৰৰ সিদ্ধান্তৰ প্ৰতিবাদত ৰাজীৱ ভৱনৰ পৰা দিছপুৰলৈ প্ৰতিবাদৰ কাৰ্যসূচী লোৱা কংগ্ৰেছে ৰাজীৱ ভৱনৰ পৰা ওলোৱাৰ সুযোগেই নাপায়। আৰক্ষীৰ হকা-বাধাৰ মাজতে আবদ্ধ থাকে ৰাজীৱ ভৱন চৌহদত ৷ অৱশ্যে ৭ জনীয়া প্ৰতিনিধিৰ দলে ৰাজ্য চৰকাৰৰ মুখ্য সচিবলৈ প্ৰেৰণ কৰে এখন স্মাৰক-পত্ৰ ৷