ৰিপুণ বৰাক ৰাজনৈতিক ভাবে ধ্বংস কৰাৰ ষড়যন্ত্ৰত নামিছে নেকি APCCৰ সভাপতি ভূপেন বৰা? AIUDFৰ বিধায়কৰ বিস্ফোৰক মন্তব্য...

ৰাজ্যসভা নিৰ্বাচনক কেন্দ্ৰ কৰি ফাঁট মেলিল কংগ্ৰেছ-AIUDFৰ মিত্ৰতা ৷ অসম প্ৰদেশ কংগ্ৰেছ কমিটীৰ সভাপতি ভূপেন বৰাই সম্বোধন কৰা এখন সংবাদমেলৰ পিছতে দুই দলৰ আভ্যন্তৰত চলি থকা আন্তঃকন্দল পোহৰলৈ আহিছে ৷

AIUDFৰ নেতা হাফিছ বৰিচ আহমেদে কয়, 'কংগ্ৰেছে নিজৰ পুৰণি চৰিত্ৰ প্ৰকাশ কৰিছে ৷ আমি মৰ্মাহত ৷ প্ৰাৰ্থী ঘোষণাৰ সময়ৰ পৰাই কংগ্ৰেছৰ প্ৰাৰ্থীক একাধিকবাৰ ভোট দিম বুলি কৈ আহিছিলো ৷ কিন্তু তাৰ বিপৰীতে কংগ্ৰেছ ৷'

দলৰ সভাপতি ভূপেন বৰাই ৰিপুণ বৰাৰ ৰাজনৈতিক কেৰিয়াৰ ধ্বংস কৰিলে ৷ ৰিপুণ বৰাক সাংসদ হোৱাটো বিচৰা নাই ভূপেন বৰাই ৷ সেয়েহে এনে চক্ৰান্ত ৰচাৰ অভিযোগ AIUDFৰ বিধায়কগৰাকীৰ ৷ আনকি ভূপেন বৰাই AIUDF দলৰ জনপ্ৰিয়তা ধ্বংস কৰাৰ চেষ্টা কৰা বুলিও অভিযোগ কৰে বিধায়ক হাফিছ বৰিচ আহমেদে।

লগতে বিধায়কগৰাকীয়ে কয় যে, 'কংগ্ৰেছ হতাশাত ভুগিছে ৷ কংগ্ৰেছৰ ২৬ জন বিধায়ক একত্ৰিত হ'ব পৰা নাই। যাৰ বাবে AIUDFক দোষাৰোপ কৰিছে ৷ ৰিপুণ বৰাই নিজ হাতে লিখিছিল এজেণ্ট পত্ৰ ৷ সেয়ে আমি নিশ্চিত আছিলো ১৫ জন একেলগে ভোট দিম ৷ কিন্তু এতিয়া আলোচনাৰ প্ৰযোজন আছে।

আনহাতে AIUDFৰ বিধায়ক আমিনুল ইছলামে কংগ্ৰেছক সমালোচনা কৰি কয় যে, 'কংগ্ৰেছে চেলু বিচাৰি আছিল ৷ দলৰ এনে সিদ্ধান্তই ৰিপুণ বৰাক ৰাজনৈতিক ভাবে হত্যা কৰিলে।'