১৬,৯৪৪ গৰাকী ছাত্ৰ-ছাত্ৰীক আনন্দৰাম বৰুৱা বঁটা প্ৰদান

শ্ৰীমন্ত শংকৰদেৱ কলাক্ষেত্ৰত ২০২০ বৰ্ষৰ হাইস্কুল শিক্ষান্ত পৰীক্ষাত ৭৫ শতাংশ নম্বৰ লাভ কৰা ছাত্ৰ ছাত্ৰীসকলক বুধবাৰে প্ৰদান কৰা হয় আনন্দৰাম বৰুৱা বঁটা। ছাত্র–ছাত্ৰীৰ শৈক্ষিক উত্তৰণৰ বাবে অসম চৰকাৰে প্ৰদান কৰি আহিছে এই বঁটা। চলিত বৰ্ষত লেপটপ ক্ৰয়ৰ বাবে নগদ ২০ হাজাৰ টকাকৈ প্ৰদান কৰা হৈছে ছাত্ৰ–ছাত্ৰীক।

ৰাজ্যৰ মুঠ ১৬,৯৪৪ গৰাকী ছাত্ৰ–ছাত্ৰীক প্ৰদান কৰা হ’ব এই বঁটা। এই বঁটাৰ বাবে চৰকাৰে মুকলি কৰিছে  মুঠ ৩৪ কোটি টকা। বঁটা প্ৰদান অনুষ্ঠানত উপস্থিত থাকে মুখ্যমন্ত্ৰী সৰ্বানন্দ সোণোৱাল,  মন্ত্ৰী ড০ হিমন্ত বিশ্ব শৰ্মা, বিধায়িকা আঙুৰলতা ডেকা।

অনুষ্ঠানত উপস্থিত থাকি শিক্ষামন্ত্ৰী হিমন্ত বিশ্ব শৰ্মাই কয় – 'কোভিড–১৯ৰ বাবে এইবাৰ সকলোৰে বেংক একাউণ্টলৈ লেপটপ কিনিবলৈ ২০ হাজাৰ টকা দিয়া হৈছে।পৰৱৰ্তী সময়ত মতামতৰ ভিত্তিত লেপটপ অথবা লেপটপ কিনিবলৈ চেক দিয়া হ’ব, সেই কথা নিৰ্ধাৰণ কৰিম। ২০০৫ বৰ্ষত বঁটা দিয়াৰ সময়ত তিনি মাহ মোৰ বাবে এক প্ৰত্যাহ্বান হিচাপে পৰিগণিত হৈছিল। ২০০৫ বৰ্ষৰ পৰা এতিয়ালৈ ৩,৭৩,৮৫৫ গৰাকী ছাত্ৰ-ছাত্ৰীৰ হাতত তুলি দিয়া হৈছে এই বঁটা। চাৰিটা বছৰ পৰিকল্পনা ৰূপায়ন বিভাগে এই আঁচনিৰ কাম কৰাৰ পিছত শিক্ষা বিভাগক ইয়াৰ দায়িত্ব দিয়া হৈছিল। এই বঁটাৰ নামৰ বাবে আনন্দৰাম বৰুৱাৰ প্ৰতিদ্বন্দ্বী কোনো নাছিল। মেট্ৰিকত ষ্টাৰ, প্ৰথম বিভাগ, স্থান আৰু ডিষ্টিংশ্যন পোৱাসকল আমাৰ জাতিৰ ভৱিষ্যতৰ সোণোৱালী  জীৱনৰ সমাজৰ আদৰ্শ।’

যোৱা কেইটামান বছৰত ৰাজ্য চৰকাৰে লোৱা সিদ্ধান্তসমূহ ভাৰতৰ মানচিত্ৰত স্থান লাভ কৰিবলৈ সক্ষম হৈছে। শীৰ্ষ পাঁচখন ৰাজ্যৰ ভিতৰত শৈক্ষিক ক্ষেত্ৰত অসমে স্থান লাভ কৰিছে। বিনামূলীয়া নামভৰ্তি, বিনামূলীয়া পাঠ্যপুথিয়ে শৈক্ষিক জীৱনৰ প্ৰাণৱন্ত কৰি তুলিছে। অনাগত পাঁচটা বছৰত এই যাত্ৰা অব্যাহত থাকিলে অসমে দেশৰ ভিতৰত নতুন স্থান লাভ কৰিবলৈ সক্ষম হ’ব। শিক্ষক নিযুক্তি প্ৰক্ৰিয়া ৰাজনীতিৰ পৰা দূৰত ৰখা হৈছে। এক হাজাৰ স্কুলক বেচৰকাৰী বিদ্যালয়ক ফেৰ মৰাকৈ প্ৰস্তুত কৰিছে। নৱেম্বৰৰ পৰা এই কাম আৰম্ভ হৈছে। ক’লে হিমন্ত বিশ্ব শৰ্মাই।

আনহাতে, অসমৰ শিক্ষা আৰু স্বাস্থ্যৰ ক্ষেত্ৰত ৬ শতাংশ খৰচ কৰা দেশৰ ভিতৰত উৎকৃষ্ঠ ৰাজ্য হিচাপে বিবেচিত হোৱাৰ কথা প্ৰকাশ কৰে মন্ত্ৰী হিমন্ত বিশ্ব শৰ্মাই। ডিচেম্বৰ মাহত উচ্চতৰ মাধ্যমিক পৰ্যায়ত প্ৰথম স্থান লাভ কৰা ছাত্ৰীসকলক বাণীকান্ত কাকতি বঁটা প্রদান কৰা হ’ব। এই বঁটাত থাকিব একোখনকৈ স্কুটী।