২০২১ত মোগলৰ বিৰুদ্ধে হ’ব বিজেপিৰ যুজঁ, মোগল কোন? বিস্ফোৰক মন্তব্য আমিনুল হক লস্কৰৰ

চমু চাপিছে অসম বিধানসভাৰ নিৰ্বাচন। শাসক–বিৰোধীৰ মাজত আৰম্ভ হৈছে তীব্ৰ বাকযুদ্ধ। দুদিন পূৰ্বে উজনিত মুখ্যমন্ত্ৰী সৰ্বানন্দ সোণোৱালে কৈছিল – ৰাজ্যত এতিয়াও মোগলৰ আক্ৰমণ চলি আছে।

কিন্তু কথা হ’ল কোন এই মোগল? মুখ্যমন্ত্ৰীৰ ভাষ্যৰ ৪৮ ঘণ্টাৰ ভিতৰতে অসম বিধান সভাৰ উপাধ্যক্ষ আমিনুল হক লস্কৰৰ সাংবাদিকৰ আগত বিস্ফোৰক মন্তব্য। আমিনুল ইছলামে স্পষ্টকৈ বুজাই দিলে – মোগল হ’ল কংগ্ৰেছ, আৰু এই কংগ্ৰেছ–এআইইউডিএফৰ বিৰুদ্ধে যুঁজ দিবলৈ সাজু হেনো বিজেপি।

সিমানতে ক্ষান্ত নাথাকি বিজেপিৰ একমাত্র সংখ্যালঘু বিধায়ক আমিনুল হক লস্কৰে ক’লে – ২০২১ৰ নিৰ্বাচন হ’ব দুই সভ্যতাৰ মাজত যুদ্ধ। সাংগঠনিক কাম কৰা বিজেপি, অগপৰ সভ্যতা বনাম ব্যক্তিকেন্দ্ৰীক কংগ্ৰেছৰ সভ্যতাৰ মাজত যুজঁ হ’ব বুলি কয় আমিনুল হক লস্কৰে।

বৰাক উপত্যকাৰ সোণাই সমষ্টিৰ বিজেপি বিধায়ক আমিনুল হক লস্কৰৰ মতে, বদৰুদ্দিন আজমলে এইবাৰ কংগ্ৰেছক ঠগিব। শেষত কংগ্ৰেছে অকলে নিৰ্বাচন খেলিব লাগিব বুলিও কয় অসম বিধান সভাৰ উপাধ্যক্ষ আমিনুল হক লস্কৰে। লস্কৰৰ মতে, বিজেপি মিত্ৰজোঁটে ১০০ প্লাছ আসনেৰে পুনৰবাৰ ৰাজ্যত চৰকাৰ গঠন কৰিব। নতুন আঞ্চলিক দলকো তীব্ৰ ভাষাৰে সমালোচনা কৰে আমিনুল হক লস্কৰে।