এবছৰত চাহ খোৱাৰ নামত ১০লাখ টকা খৰচ কৰিলে কোনে?

নিবনুৱাক স্বাৱলম্বী কৰাৰ প্ৰচেষ্টাৰে ৰাজ্য চৰকাৰে আত্মসহায়ক গোটক বিভিন্ন বেংকৰ জৰিয়তে ঋণ প্ৰদান কৰাৰ বিষয়ে আপুনি অৱগত। কিন্তু গাঁৱৰ দুখীয়া মহিলা আত্মসহায়ক গোটক ঋণ প্ৰদানৰ নামতো ৰাষ্ট্ৰীয় গ্ৰামীণ জীৱিকা আঁচনিত সংঘটিত হৈছে ভয়াবহ দূৰ্নীতি। কেৱল চাহ খোৱাৰ নামতে এটা বছৰত ১০লাখ টকাৰ খৰছ দেখুৱাৰ এই ভয়ংকৰ অভিযোগ নগাঁৱৰ আৰটিআই কৰ্মী নৰেন্দ্ৰ প্ৰসাদ চৌহানৰ।

উল্লেখযোগ্য যে, নগাঁও জিলাৰ অন্তৰ্গত উপভোক্তা সকলে চৰকাৰী আঁচনিৰ দ্বাৰা উপকৃত হোৱাৰ বিভিন্ন তথ্য বিচাৰি চৌহানে নগাঁও গ্ৰামীন জীৱিকা অভিযানৰ কাৰ্যালয়ত তথ্য  জনাৰ অধিকাৰ আইনৰ অধীনত আবেদন দাখিল কৰিছিল। কিন্তু আবেদনৰ উত্তৰ পোৱাৰ পিচতে তেওঁ সংবাদ মাধ্যমৰ সন্মুখত বিভাগটোৰ দূৰ্নীতিৰ বিষয়ে সৰৱ হয়। চৌহানে সংবাদ মাধ্যমক জানিবলৈ দিয়া অনুসৰি বিভিন্ন ভুৱা গোটক ঋণ প্ৰদানৰ নামত ধন সৰকাইছে বিভাগটোৰ বিষয়া তথা কৰ্মচাৰী সকলে।

অভিযোগমতে, আত্মসহায়ক গোটৰ উৎকৰ্ষ সাধনৰ বাবে অনুস্থিত কৰা "সৰস মেলা" ৰ নামতো বৃহৎ লুণ্ঠন চলাইছে বিভাগটোৱে। ইপিনে মহিলা আত্মসহায়ক গোটৰ সভাত চাহৰ যোগান ধৰাৰ নামতে খাগৰিজান উন্নয়ণ খণ্ডত ১০লাখ টকা খৰচ কৰা দেখুওৱা হৈছে বুলিও অভিযোগ কৰে চৌহানে। এইদৰে বিভিন্ন শিতানত বৃহৎ পুঁজি ব্যয় কৰা দেখুৱাই গ্ৰামোন্নয়ণৰ ধন আত্মসাৎ কৰাৰ অভিযোগ তুলিছে চৌহানে। অৱশ্যে নগাঁও জিলা গ্ৰামীণ জীৱিকা অভিযানৰ দায়িত্বশীল বিষয়াসকলে চৌহানৰ এই অভিযোগক নস্যাৎ  কৰিছে।