ব্যক্তিগত বিদ্যালয়ে ৰেহাই দিব লাগিব ছাত্ৰ–ছাত্ৰীৰ ২৫ শতাংশ মাচুল, অন্যথা বন্ধ হ’ব স্কুল

কোভিড–১৯ৰ এই জটিল সময়ত অসমৰ সকলো ব্যক্তিগত স্কুলক ছাত্ৰ–ছাত্ৰীৰ মাহেকীয়া মাচুল ২৫% ৰেহাই দিবলৈ আহ্বান জনাইছিল শিক্ষা মন্ত্ৰী হিমন্ত বিশ্ব শৰ্মাই। তেনেক্ষেত্ৰত কোনো স্কুলে যদি মাচুল ৰেহাই নিদিয়ে আৰু সেই স্কুলৰ বিৰুদ্ধে লিখিত অভিযোগ পাই, তেন্তে উক্ত স্কুলসমূহ সম্পূৰ্ণৰূপে বন্ধ কৰি দিয়াৰ হুংকাৰ দিয়ে শিক্ষা মন্ত্ৰী হিমন্ত বিশ্ব শৰ্মাই।

ইফালে কোৰোণা মহামাৰী বহু পৰিমাণে নিয়ন্ত্ৰণ হৈছে যদিও স্কুল সম্পূৰ্ণৰূপে খোলাৰ কথাটো ৰাজ্য চৰকাৰে বিবেচনা কৰি আছে বুলি সংবাদ মেলত জনায় শিক্ষা মন্ত্ৰীগৰাকীয়ে। অৱশ্যে অসমৰ চৰকাৰী–বেচৰকাৰী সকলো স্কুল–কলেজ আৰু বিশ্ববিদ্যালয়ৰ শিক্ষক–শিক্ষয়িত্ৰী, অধ্যাপকে ২১ আগষ্টৰ পৰা ৩১ আগষ্টলৈ কোভিড টেষ্ট কৰাটো বাধ্যতামূলক। তদুপৰি, কোভিডৰ নিগেটিভ ৰিপ’ৰ্ট লৈ সকলো শিক্ষক–শিক্ষয়িত্ৰী আৰু অধ্যাপকে ১ ছেপ্টেম্বৰৰ পৰা নিজ নিজ স্কুল–কলেজ অথবা বিশ্ববিদ্যালয়ৰ চাকৰিত যোগদান কৰিব লাগিব বুলি সংবাদ মেলত জানিবলৈ দিয়ে মন্ত্ৰী হিমন্ত বিশ্ব শৰ্মাই।