“মই সদায় চৰকাৰৰ বিৰোধী; আজি কিন্তু চৰকাৰক অন্তৰৰ পৰা ধন্যবাদ জনাইছোঁ”: বডোফাৰ জন্মদিন 'ছাত্ৰ দিৱস'ত সদনত অখিল গগৈৰ মন্তব্য়

বড়ো জাতিৰ পিতৃস্বৰূপ বডোফা উপেন্দ্ৰনাথ ব্ৰক্ষ্মৰ উপজা দিনটোক ৰাজ্য চৰকাৰে 'ছাত্ৰ দিৱস' হিচাপে আজি পালন কৰাৰ সময়তে অসম বিধানসভাৰ মজিয়াত বডোফাক স্মৰণ কৰা হয় ৷ সদনৰ মজিয়াত সকলো দলৰ পৰা একোজনকৈ সদস্যই বডোফাৰ জীৱনৰ ওপৰত আলোকপাত কৰি ভাষণ দিয়ে । লগতে চৰকাৰৰ পদক্ষেপক প্ৰশংসা কৰে।

আজি বড়ো জাতিৰ পিতামহস্বৰূপ উপেন্দ্ৰনাথ ব্ৰক্ষ্মৰ ওপজা দিন ৷ বডোফা উপেন্দ্ৰনাথ ব্ৰক্ষ্মৰ ওপজা দিনটোক ৰাজ্যত 'ছাত্ৰ দিৱস' হিচাপে পালন কৰিব বুলি ড° হিমন্ত বিশ্ব শৰ্মাৰ চৰকাৰে ঘোষণা কৰাৰ পিছত আজি প্ৰথমবাৰৰ বাবে পালন কৰা হয় ছাত্ৰ দিৱস ৷ বডোফাৰ ওপজা দিনটোত আজি অসম বিধানসভাৰ মজিয়াতো বডোফাক স্মৰণ কৰা হয় ৷ অধ্যক্ষ বিশ্বজিত দৈমাৰীৰ উদ্যোগত বডোফাৰ জীৱনৰ ওপৰত আলোকপাত কৰা হয় ৷

সংসদীয় পৰিক্ৰমা মন্ত্ৰী পীযুষ হাজৰিকাই সদনত বডোফা উপেন্দ্ৰনাথ ব্ৰক্ষ্মক স্মৰণ কৰি বডোফা সকলো জাতিৰ প্ৰেৰণা হ'ব লাগে বুলি উল্লেখ কৰে ৷ অসম গণ পৰিষদৰ সভাপতি তথা মন্ত্ৰী অতুল বৰায়েও সদনত অতীত ৰোমন্থন কৰি বডোফাক শ্ৰদ্ধা জনায় ৷ বডোফাক লগ পোৱা আৰু বডোফাৰে হোৱা বৈঠকসমূহৰ কথা সদনত স্মৰণ কৰিলে প্ৰাক্তন মন্ত্ৰী ভৰত চন্দ্ৰ নৰহে ৷

AIUDFৰ ধিঙৰ বিধায়ক আমিনুল ইছলামে বডোফাক স্মৰণ কৰি ক'লে— “বডোফা কেৱল বড়ো জাতিৰেই নহয়, সকলো জনগোষ্ঠীয় ৰাইজৰ প্ৰেৰণাৰ প্ৰতীক ৷” কটন আৰু বিশ্ববিদ্যালয়ৰ দিনত বডোফাৰে কটোৱা সময়ৰ কথা সুঁৱৰিলে বিধায়ক দুৰ্গা দাস বড়োয়ে ৷ স্মৰণ কৰিলে এসময়ত বড়ো জাতিৰ বাবে সশস্ত্ৰ সংগ্ৰাম কৰা গোবিন্দ বসুমতাৰীয়ে ৷

CPI (M)ৰ বিধায়ক মনোৰঞ্জন তালুকদাৰে বডোফাক স্মৰণ কৰি ক'লে — “মোতকৈ বয়সত সৰু আছিল বডোফা ৷ কিন্তু তেওঁৰ নেতৃত্বতে বড়ো জাতিয়ে প্ৰাণ পাই উঠিল ৷” অখিল গগৈয়ে বডোফাৰ ওপজা দিনটোক ছাত্ৰ দিৱস হিচাপে পালন কৰাৰ সিদ্ধান্তক প্ৰশংসা কৰি ক'লে— “সকলোৱে জানে যে মই সদায় চৰকাৰৰ বিৰোধী ৷ কিন্তু বডোফা উপেন্দ্ৰনাথ ব্ৰক্ষ্মৰ ক্ষেত্ৰত চৰকাৰে লোৱা পদক্ষেপৰ বাবে মই অন্তৰৰ পৰা চৰকাৰক ধন্যবাদ জনাইছোঁ ৷ বডোফাক মই লগ পোৱা নাছিলোঁ। কিন্ত তেওঁৰ সৈতে মোৰ এটা সম্পৰ্ক আছে ৷ সেয়া হ'ল মই কটনত ১৯৯৩ চনত নামভৰ্তি কৰাৰ পিছত মই হোষ্টেলত যিখন বিচনা পাইছিলো; সেইখনত এটা সময়ত শুইছিল উপেন্দ্ৰনাথ ব্ৰক্ষ্ময়ে । বিচনাখনত লিখা আছিল উপেন্দ্ৰনাথ ব্ৰক্ষ্ম বুলি ৷”

অসমীয়াত ব্ৰেকিং নিউজ সৰ্বপ্ৰথম News18 অসমত। শেহতীয়া খবৰ, লাইভ নিউজ আপডেট, সবাতোকৈ বিশ্বাসযোগ্য অসমীয়া নিউজ ৱেবছাইট News18 অসম।