এজেপি শাসনলৈ আহিলে পুনৰুজ্জীৱিত কৰা হ’ব নগাঁও আৰু কাছাৰ কাগজ কল

News18 Assam | News18-Assam
Updated:January 21, 2021, 4:12 PM IST
এজেপি শাসনলৈ আহিলে পুনৰুজ্জীৱিত কৰা হ’ব নগাঁও আৰু কাছাৰ কাগজ কল
জাগীৰোডৰ নগাঁও আৰু কাছাৰ কাগজ কল পুনৰুজ্জীৱিত কৰাৰ দাবীত আজি নগাঁও কাগজ কলৰ মুখ্যদ্বাৰত এক প্ৰতিবাদী অৱস্থান কাৰ্যসূচী ৰূপায়ণ কৰে অসম জাতীয় পৰিষদ আৰু জাতীয় শ্ৰমিক শক্তিয়ে৷

জাগীৰোডৰ নগাঁও আৰু কাছাৰ কাগজ কল পুনৰুজ্জীৱিত কৰাৰ দাবীত আজি নগাঁও কাগজ কলৰ মুখ্যদ্বাৰত এক প্ৰতিবাদী অৱস্থান কাৰ্যসূচী ৰূপায়ণ কৰে অসম জাতীয় পৰিষদ আৰু জাতীয় শ্ৰমিক শক্তিয়ে৷

  • Share this:
কেইবাবছৰ ধৰি বন্ধ হৈ আছে অসমৰ দুটাকৈ বৃহৎ কাগজ উদ্যোগ নগাঁও আৰু কাছাৰ কাগজ কল৷ ফলত ৪৮ মাহে প্ৰাপ্য দৰমহাৰ পৰা বঞ্চিত হৈ বিভিন্ন অভাৱনীয় পৰিস্থিতিৰ সন্মুখীন হৈছে কল দুটাৰ কৰ্মচাৰীসকল৷ যাৰ পৰিণতিত কেইবাগৰাকীও লোকে বিনা চিকিৎসায় মৃত্যুক আঁকোৱালি লোৱাৰ লগতে আত্মহত্যাৰ দৰে চৰম পথ বাচি লৈছে জাগীৰোড কাগজ কলৰ তিনিগৰাকী কৰ্মচাৰীয়ে৷

কাগজ কল পুনৰুজ্জীৱিত কৰা আৰু কৰ্মচাৰীৰ দৰমহা আদায়ৰ দাবীত বহুবাৰ বিভিন্ন দল–সংগঠন তথা কল দুটাৰ কৰ্মচাৰীয়ে প্ৰতিবাদ সাব্যস্ত কৰি আহিছে যদিও কোনো কাণসাৰ দিয়া নাই চৰকাৰে৷ মুখ্যমন্ত্ৰী সৰ্বানন্দ সোণোৱালেও যিকোনো প্ৰকাৰে আইনৰ সহায় লৈ হ’লেও নগাঁও আৰু কাছাৰ কাগজ কল দুটা কাৰ্যক্ষম কৰা হ’ব বুলি দিয়া প্ৰতিশ্ৰুতি আজিও প্ৰতিশ্ৰুতি হৈয়ে থাকিল৷

জাগীৰোডৰ নগাঁও আৰু কাছাৰ কাগজ কল পুনৰুজ্জীৱিত কৰাৰ দাবীত আজি নগাঁও কাগজ কলৰ মুখ্যদ্বাৰত এক প্ৰতিবাদী অৱস্থান কাৰ্যসূচী ৰূপায়ণ কৰে অসম জাতীয় পৰিষদ আৰু জাতীয় শ্ৰমিক শক্তিয়ে৷ প্ৰতিবাদী কাৰ্যসূচীত উপস্থিত থাকি কাগজ কলৰ প্ৰতি গুজৰাটী বণিয়াৰ চকু থকাৰ বাবেই ষড়যন্ত্ৰমূলকভাৱে নগাঁও আৰু কাছাৰ কাগজ কলদুটা চৰকাৰী ষড়যন্ত্ৰত বন্ধ কৰা হ’ল বুলি মন্তব্য কৰে আঞ্চলিক দল অসম জাতীয় পৰিষদৰ সভাপতি লুৰিণজ্যোতি গগৈয়ে৷

আনহাতে, এইবাৰ অসম জাতীয় পৰিষদৰ চৰকাৰ গঠন হ’লে জাগীৰোড আৰু কাছাৰ কাগজ কল দুটা পুনৰুজ্জীৱিত কৰিব বুলিও মন্তব্য কৰে লুৰিণজ্যোতি গগৈয়ে৷ আনহাতে, আগন্তুক নিৰ্বাচনত অসমত পুনৰ ভাৰতীয় জনতা পাৰ্টীৰ চৰকাৰ গঠন হ’লে সেই চৰকাৰে মছজিদ ভাঙি দিব বুলি আজমলে কৰা সাম্প্ৰদায়িক মন্তব্য সন্দৰ্ভতো প্ৰতিক্ৰিয়া প্ৰকাশ কৰে লুৰিণজ্যোতি গৈয়ে৷ তেওঁ কয় যে বিজেপি আৰু এ আই ইউ ডি এফ দুয়োটাই সাম্প্ৰদায়িক দল৷ সাম্প্ৰদায়িক দুয়োটা দলৰ মাজত আছে গোপন বুজাবুজি৷ দুয়োটা দলৰে লক্ষ্য ধৰ্মীয় মেৰুকৰণ৷ কেবল ভোটৰ বাবে বিজেপি আৰু এ আই ইউ ডি এফ দলে অসমত সাম্প্ৰদায়িক বিষবাষ্প বিয়পাই আহিছে৷ আগন্তুক দিনত অসমখনক জাতি–জনগোষ্ঠীৰ সমন্বয়েৰে জীয়াই ৰখাৰ চেষ্টা অসম জাতীয় পৰিষদৰ লক্ষ্য বুলিও উল্লেখ কৰে লুৰিণজ্যোতি গগৈয়ে৷
Published by: Sanjay Kumar Das
First published: January 21, 2021, 4:12 PM IST
আৰু চাওক
পৰৱৰ্তী বাতৰি

শেহতীয়া বাতৰি