PM কিষাণ আঁচনিৰ দুৰ্নীতিৰ CBI তদন্তৰ দাবী AJPৰ! ভুৱা হিতাধিকাৰীৰ তালিকা ৰাজহুৱা কৰাৰ দাবী।

ৰাজ্যৰ লাখ লাখ প্ৰকৃত কৃষকক বঞ্চিত কৰি ভুৱা কৃষকে সৰকাইছে PM কিষাণ আঁচনিৰ ধন ৷ হিতাধিকাৰী  কৃষকৰ তালিকাত  বিজেপি মিত্ৰজোঁটৰ নেতা-পালিনেতাৰ অঙহী-বঙহীৰো নাম থকাৰ অভিযোগ। বিজেপি মিত্ৰজোঁটৰ নেতাৰ হস্তক্ষেপত বাছনি হৈছে PM কিষাণ আঁচনিৰ হিতাধিকাৰীৰ নাম ৷ এই অভিযোগ অসম জাতীয় পৰিষদৰ ৷

২০১৮ চনত ৰূপায়ন কৰা এই আঁচনিত বিয়াগোম দুৰ্নীতি হোৱাৰ কথা ইতিমধ্যে স্বীকাৰ কৰিছে কৃষি মন্ত্ৰী অতুল বৰাই ৷ কিন্তু অজাপৰ দাবী দুৰ্নীতি CBIৰ জড়িয়তে সঠিক তদন্ত কৰাৰ দাবী AJPৰ। তদুপৰি দুৰ্নীতি সংঘটিত কৰা লোকৰ তালিকা হ'ব লাগিব ৰাজহুৱা ৷

PM কিষাণ আঁচনিক লৈ ৰাজ্য চৰকাৰে প্ৰতিবাৰে বিভ্ৰান্তিকৰ তথ্য প্ৰকাশ কৰাৰ অভিযোগ কৰে দলটোৱে ৷ সময়ে সময়ে কৃষি বিভাগে সলনি কৰিছে হিতাধিকাৰী আৰু ভূৱা কৃষকৰ তালিকা ৷ যাৰ বাবে দুৰ্নীতিৰ বিৰুদ্ধে শূন্য সহনশীলতাৰ স্থিতি লোৱা মুখ্যমন্ত্ৰী হিমন্ত বিশ্ব শৰ্মাই কৃষি মন্ত্ৰী অতুল বৰাক জৱাবদিহি কৰাৰ দাবী জনাইছে অজাপই ৷

ইপিনে একেখন সংবাদমেলত APSC তদন্তক লৈ সৰৱ হৈ উঠে দলটো ৷ ৰাকেশ পালৰ কাৰ্যকালৰ সকলো দুৰ্নীতিৰ তদন্তৰ দাবী জনাইছে দলটোৱে ৷

অসমীয়াত ব্ৰেকিং নিউজ সৰ্বপ্ৰথম News18 অসমত। শেহতীয়া খবৰ, লাইভ নিউজ আপডেট, সবাতোকৈ বিশ্বাসযোগ্য অসমীয়া নিউজ ৱেবছাইট News18 অসম।