মহাজোঁটকলৈ আজমলৰ বিস্ফোৰণ। চৰকাৰ হ'লে ময়েই মন্ত্ৰিত্ব বিতৰণ কৰিম বুলি আজমলৰ দম্ভালি। 'তলা-ছাবি যাৰ, চৰকাৰ তাৰ' ঘোষণাৰে কংগ্ৰেছক বেকফুটত ঠেলাৰ চেষ্টা। ছেগ বুজি স্মৃতি ইৰাণীয়ে দিলে এশিকনি।

গছত কঠাল নপকোতেই ওঠত তেল সানিছে বদৰুদ্দিন আজমলে। নিৰ্বাচন শেষেই হোৱা নাই, মন্ত্ৰী কোন হ'ব তাৰেই অংকত ব্যস্ত আজমল। চৰকাৰ কোনে গঠন কৰিব সেয়াই নিশ্চিত হোৱা নাই, কিন্তু দলগাঁৱত আজমলে ঘোষণা কৰিলে- মহাজোঁটৰ চৰকাৰ হ'লে মন্ত্ৰিত্ব বিতৰণ কৰিব হেনো আজমলে।

মহাজোঁটৰ চৰকাৰ হ'লে মন্ত্ৰিত্ব বিতৰণ কৰিব হেনো বদৰুদ্দিন আজমলে। আজমলৰ দাবী- মহাজোঁটৰ ছাবি কাঠি আছে তেওঁৰ হাতত। 'তলা-চাবি যাৰ হাতত থাকিব মন্ত্ৰীত্বও তেওঁৱেই বিতৰণ কৰিব'। আজমলে লগতে কয় যে মহাজোঁটৰ চৰকাৰ হ'লে চৰকাৰৰ ছাবিকোছাও তেওঁৰ সৈতেই থাকিব। সেয়ে দলগাঁৱত ঘোষণা কৰিলে-মজিবুৰ ৰহমান মন্ত্ৰী হ'বই।

এই মন্তব্যৰ পিছতে কংগ্ৰেছ নেতা দেৱব্ৰত শইকীয়াই উভতি ধৰিছে আজমলক। দেৱব্ৰত শইকীয়াৰ মন্তব্য, 'ছাবি থাকিলে কি হ'ব, হাত আমাৰ লগত আছে'।

মহাজোঁটৰ এই খৰিয়াল দেখি কেন্দ্ৰীয় মন্ত্ৰী স্মৃতি ইৰাণীয়েও ভালকৈ এশিকনি দিলে কংগ্ৰেছ-এআইইউডিএফক। দ্বিতীয় পৰ্যায়ৰ নিৰ্বাচনী প্ৰচাৰ চলাবলৈ অহা ইৰাণীয়ে ক'লে, 'চৰকাৰৰ ছাবি আছে জনতাৰ হাতত, জনতাই জানে ক'ত লগাব লাগে তলা'।