সংঘাত স্পষ্ট! অগপৰ কাৰ্যনিৰ্বাহকলৈ নামাতিলে প্ৰফুল্ল কুমাৰ মহন্ত, বৃন্দাবন গোস্বামী, পবিন্দ্ৰ ডেকাক

অসম গণ পৰিষদৰ আমবাৰীস্থিত মুখ্য কাৰ্যালয়ত একাদশ কেন্দ্ৰীয় সাধাৰণ অধিৱেশন অনুষ্ঠিত হ’ব বৃহস্পতিবাৰে। পুৱা ৯ বজাৰ পৰা আৰম্ভ হ’বলগীয়া অধিৱেশনৰ পূৰ্বে আমবাৰীতে বুধবাৰে সন্ধিয়া ছয় বজাৰ পৰা অনুষ্ঠিত হৈছিল আঞ্চলিক দলটোৰ গুৰুত্বপূৰ্ণ কাৰ্যনিৰ্বাহক সভা। কিন্তু সভালৈ নামাতিলে দলটোৰ প্ৰতিস্থাপক সভাপতি তথা প্ৰাক্তন মুখ্যমন্ত্ৰী প্ৰফুল্ল কুমাৰ মহন্ত, প্ৰাক্তন সভাপতি তথা বিধায়ক বৃন্দাবন গোস্বামী আৰু পাটাচাৰকুছি সমষ্টিৰ বিধায়ক, প্ৰাক্তন মন্ত্ৰী পবিন্দ্ৰ নাথ ডেকাৰ উপৰিও দলটোৰ আন বহু নেতা-কৰ্মীক।



ইফালে কোৰোণা পজিটিভ হোৱাৰ বাবে সভাত উপস্থিত নাছিল বিধায়কদ্বয় ৰমেন্দ্ৰ নাৰায়ণ কলিতা আৰু ভৱেন্দ্ৰ নাথ ভৰালী। শেহতীয়াকৈ পোৱা খবৰ অনুযায়ী, অগপৰ একাদশ কেন্দ্ৰীয় সাধাৰণ অধিৱেশনত স্থগিতাদেশ জাৰি কৰিছে ছেচন আদালতে। অগপৰ পূৰ্বৰ কেন্দ্ৰীয় কাৰ্যনিৰ্বাহক সদস্য, গিৰীণ তালুকদাৰ, জীতেন ডেকা, হেমেন লহকৰে আবেদন জনাইছিল আদালতত। অগপ দলৰ সংবিধান অৱমাননা কৰি অধিৱেশন অনুষ্ঠিত কৰাৰ সিদ্ধান্ত লোৱা বুলি আবেদন কৰিছিল নেতাকেইজনে।

আদালতে ২০২০ চনৰ ১৯ নৱেম্বৰ পৰ্যন্ত অধিৱেশন অনুষ্ঠিত কৰাৰ ক্ষেত্ৰত স্থগিতাদেশ জাৰি কৰিছে বুলি খবৰ পোৱা গৈছে ৷ আদালতৰ নিৰ্দেশৰ পিছত বৃহস্পতিবাৰে সাধাৰণ অধিৱেশনৰ সন্দৰ্ভত দলে কি সিদ্ধান্ত লয়, সেয়া হ’ব লক্ষণীয়।