নিগম নিকায় নিৰ্বাচনত বিজেপিৰ সৈতে মিত্ৰতা কৰিবনে অকলে খেলিব? দিছপুৰত অসম গণ পৰিষদৰ গুৰুত্বপূৰ্ণ কেন্দ্ৰীয় কাৰ্যনিৰ্বাহক বৈঠক

দিছপুৰৰ লোক নিৰ্মাণ বিভাগৰ প্ৰশিক্ষণ কেন্দ্ৰত অসম গণ পৰিষদ দলৰ কেন্দ্ৰীয় কাৰ্য্যনিৰ্বাহক বৈঠক অনুষ্ঠিত হৈছে৷ আগন্তুক নিগম নিকায় নিৰ্বাচন সন্দৰ্ভত বৈঠকত আলোচনা কৰে দলীয় নেতৃত্বই ৷  উপস্থিত থাকে অগপৰ সভাপতি অতুল বৰা, কাৰ্যকৰী সভাপতি কেশৱ মহন্ত প্ৰমুখ্যে দলৰ কেন্দ্ৰীয় কমিটীৰ সদস্যসকল ৷

আগন্তুক নিগম নিকায় নিৰ্বাচনক লৈ অগপৰ কেন্দ্ৰীয় কাৰ্যনিৰ্বাহকে কেইবাটাও গুৰুত্বপূৰ্ণ সিদ্ধান্ত গ্ৰহণ কৰাৰ সম্ভাৱনা আছে ৷ বিশেষকৈ নিগম নিকায় নিৰ্বাচনত মিত্ৰতাত থাকি নিৰ্বাচন খেলাৰ পোষকতা কৰিছে বিধায়ক ৰমেন্দ্ৰ নাৰায়ণ কলিতাই ৷

অকলে নিৰ্বাচনত প্ৰতিদ্বন্দিতা কৰা সন্দৰ্ভত কলিতাই কয় যে, 'পূৰ্বৰ পৰিবেশ বেলেগ আছিল এতিয়া বেলেগ হৈছে ৷  বিধানসভা নিৰ্বাচন হোৱাৰ প্ৰায় ছয় মাহ হৈছেহে ৷ গতিকে আমি অকলে খেলাৰ প্ৰশ্ন নাহে ৷ যদি বিজেপিয়ে অকলে খেলে তেতিয়া আমাৰ দলে বিবেচনা কৰিম ৷ নিৰ্বাচনৰ বাবে সকলোৱে প্ৰস্তুত থাকিব লাগে, অগপ দলেও প্ৰস্তুতি চলাই আছে।'

'অগপই পূৰ্বেও মিত্ৰতাত থাকি অথবা অকলে নিৰ্বাচন খেলিছে ৷ সময়ে যি আহ্বান জনাই আমি সেইমতে আগবাঢ়ি যাম ৷'- এনেদৰে কয় অগপৰ বিধায়কগৰাকীয়ে। ইপিনে নাগৰিকত্ব সংশোধনী আইনৰ বিৰুদ্ধে শেহতীয়াকৈ বিভিন্ন দল সংগঠনে হুংকাৰ প্ৰদান কৰিছে ৷ তাক লৈ অগপৰ স্থিতি সন্দৰ্ভত ৰমেন্দ্ৰ নাৰায়ণ কলিতাই কয় যে, 'দলৰ কি স্থিতি সেয়া ৰাইজে দেখিছে ৷ গতিকে কোৱাৰ কোনো প্ৰয়োজন নাই ৷'