‘বিশিষ্ট ব্যক্তিসকলৰ সত্‍কাৰ কৰি মই সুখী’- সুদীৰ্ঘ ৪০ বছৰে মৃতকৰ সত্‍কাৰ কৰা হীৰামন চৌধুৰীৰ বিষয়ে জানক

মামনি ৰয়চম গোস্বামীৰ পৰা দীপালী বৰঠাকুৰলৈকে, সুধাকণ্ঠৰ পৰা সুগন্ধি পখিলাৰ কবিলৈকে, কাক সৎকাৰ কৰা নাই তেওঁ? গৌৰৱ গগৈৰ সৈতে প্ৰাক্তন মুখ্যমন্ত্ৰী তৰুণ গগৈৰ চাৰিওকাষে প্ৰদক্ষিণ কৰি বৃহস্পতিবাৰে প্ৰাক্তন মুখ্যমন্ত্ৰী তৰুণ গগৈৰো শেষকৃত্য কৰিলে হীৰামন চৌধুৰীয়ে ৷

হীৰামন চৌধুৰীয়ে সুদীৰ্ঘ ৪০বছৰ ধৰি কৰি আহিছে মৃতদেহৰ সৎকাৰ ৷ ড৹ মামনি ৰয়চম গোস্বামীৰ নশ্বৰ দেহৰ সৎকাৰো কৰিছিল হীৰামন চৌধুৰীয়ে ৷ সৎকাৰ কৰিছিল সুধাকণ্ঠ ড৹ ভূপেন হাজৰিকাৰো নশ্বৰ দেহ ৷ সৎকাৰ কৰিছিল সুগন্ধি পখিলাৰ কবি হীৰেণ ভট্টাচাৰ্য, কুকিলকণ্ঠি গায়িকা দীপালী বৰঠাকুৰৰো নশ্বৰদেহ ৷

শিলপুখুৰী নিবাসী হীৰামন চৌধুৰীৰ বয়স এতিয়া ৬৪ বছৰ ৷ ৬৪ বছৰীয়া GMCৰ সহ স্বাস্থ্য পৰিদৰ্শক হীৰামন চৌধুৰীয়ে নিজেই নাজানে আজিলৈকে কিমান কৰিলে সৎকাৰ ৷ বহু কেইগৰাকী বৰেণ্য ব্যক্তিৰ সৎকাৰ কৰি নিজকে কৃতাৰ্থ বুলি ভাৱে হীৰামন চৌধুৰীয়ে।

"তেতিয়া কোনো আহিবলৈ সাহস কৰা নাছিল ৷ মই কিন্তু কাহানিবাই সাহসী আছিলো ৷ মই কিমান লোকৰ সৎকাৰ কৰিলো নিজেও নাজানো ৷ মামনি বাইদেউৰ পৰা তৰুণ গগৈলৈকে সৎকাৰ কৰি মই সুখী ৷ আমি যেতিয়া সৎকাৰ আৰম্ভ কৰিছিলো, তেতিয়া মানুহেই নাছিল ৷ আজিৰ দিনত সৎকাৰ কৰা মানুহ বাঢ়িল ৷"- হীৰামন চৌধুৰী