বৰপুত্ৰ বিদ্যালয়ৰ অধ্যক্ষ, মাজু পুত্ৰ গাওঁবুঢ়া, কিন্তু জীৱনৰ বিয়লি বেলাত নৰক যন্ত্ৰণা এগৰাকী আইতাৰ

‘মোৰ নাম ৰূপভানু, মোৰ তিনিজন পুত্ৰ সন্তান, তাৰে ডাঙৰজন অধ্যক্ষ, মাজুজন গাওঁবুঢ়া আৰু সৰুজন ব্যৱসায়ী ৷ মই বৰ কষ্টত আছো ৷ ডাঙৰ পুত্ৰ অধ্যক্ষ হ’লেও মোৰ খবৰ নলয়, আনকি মৃত্যুৰ সময়ত মোৰ স্বামীয়ে এক বিঘা মাটি দি থৈ গৈছিল, সেইখিনিও আজি প্ৰায় ২৫ বছৰ ধৰি বৰ পুত্ৰই দখল কৰি আছে।’– এয়া এগৰাকী দুখুনী মাতৃৰ নিজে তুলি–টালি ডাঙৰ–দীঘল কৰা পুত্ৰৰ বিৰুদ্ধে ক্ষোভ।

এগৰাকী নব্বৈ বছৰ বয়সীয়া বৃদ্ধাৰ কৰুণ জীৱন গাঁথা। থাকিবলৈ নাই এখন ঘৰ। জৰাজীৰ্ণ গোহালি সদৃশ টিনপাতৰ চালিৰ তলত বসবাস কৰে আইতাগৰাকীয়ে। জীৱনৰ বিয়লি বেলাত নৰক যন্ত্ৰণা ভোগা আইতাগৰাকীৰ আছে  তিনিজন পুত্ৰ। বৰপুত্ৰ বিদ্যালয়ৰ অধ্যক্ষ, মাজু পুত্ৰ গাওঁবুঢ়া আৰু কনিষ্ঠ পুত্ৰ ব্যৱসায়ী ৷

দক্ষিণ কামৰূপৰ কালাতলীৰ আইতা গৰাকীৰ নাম ৰূপভানু ৷ আইতাগৰাকীৰ বৰপুত্ৰ ৰফিকুল আলম কালাতলী কাঠমী আঞ্চলিক ছিনিয়ৰ ছেকেণ্ডাৰী বিদ্যালয়ৰ অধ্যক্ষ।  পাষাণ হৃদয়ৰ  ৰফিকুল আলমে বৃদ্ধাৱস্থাত মাতৃক ভৰণ-পোষণ কৰাতো দূৰৈৰে কথা 'মা' বুলি মাত এষাৰো নিদিয়ে ৷

বেমাৰত বিছনাত পৰি থাকিলেও আইতাৰ খবৰ লবলৈ আহৰি নাই অধ্যক্ষ ৰফিকুল আলম নাইবা গাওঁবুঢ়া ফুলচান আলী ৷ আনকি মৃত্যুৰ সময়ত স্বামীয়ে এৰি থৈ যোৱা সা-সম্পত্তিও বল পূৰ্ব্বক ভাৱে দখল কৰি আছে চৰকাৰী বিদ্যালয়ৰ অধ্যক্ষ ৰফিকুল আলমে ৷ নিজ পুত্ৰৰ অত্যাচাৰৰ পৰিত্ৰান পাবলৈ অসহায় বৃদ্ধা গৰাকী আইনৰ কাষ চাপিছিল। কিন্তু নাপালে   কোনো সুফল।