উচ্চ শিক্ষা: কোকৰাঝাৰত উপস্থিত বাংলাদেশৰ পাঁচজনীয়া বড়ো ছাত্ৰ-ছাত্ৰীৰ দল

বিজু কুমাৰ ডেকা: ৰাষ্ট্ৰীয় নাগৰিকপঞ্জী (NRC)ৰ চূড়ান্ত তালিকা প্ৰকাশলৈ মাজত মাত্ৰ এটা সপ্তাহ ৷ সমগ্ৰ ৰাজ্যত ইতিমধ্যে গঢ়ি তোলা হৈছে বিশেষ নিৰাপত্তা ব্যৱস্থা ৷ NRC প্ৰকাশৰ পিছত অবৈধ বহিৰাগত বাংলাদেশী বিতাৰণ হ'বনে? এইলৈ চলি আছে তুমুল বিৰ্তক।

এনে এক সময়তে বাংলাদেশৰ পৰা আহিছে পাঁচজনীয়া ছাত্ৰ-ছাত্ৰীৰ এটা দল ৷ লক্ষ্য তথা উদ্দেশ্য- উচ্চ শিক্ষা ৷ ইতিমধ্যে বড়ো জনগোষ্ঠীয় পাঁচজনীয়া ছাত্ৰ-ছাত্ৰীৰ দলটো উপস্থিত হৈছে কোকৰাঝাৰত ৷

বৃহস্পতিবাৰে কোকৰাঝাৰত বাংলাদেশৰ পাঁচ বড়ো ছাত্ৰ-ছাত্ৰীৰ দলটো উপস্থিত হোৱাৰ পিছত শনিবাৰে ছাত্ৰ-ছাত্ৰীৰ দলটোক আদৰণি জনোৱা হয় ৷ কোকৰাঝাৰৰ ছায়েন্স কলেজত আয়োজন কৰা আদৰণি অনুষ্ঠানটোত ৰাজ্যসভাৰ সাংসদ বিশ্বজিত দৈমাৰী, বড়ো সাহিত্য সভা আৰু অন্যান্য দল-সংগঠনে দলটোক আদৰণি জনায় ৷

এই অনুষ্ঠানত ছাত্ৰ-ছাত্ৰীৰ দলটোক আদৰণি জনাই সাংসদ দৈমাৰীয়ে চুবুৰীয়া বাংলাদেশৰ সৈতে ভাৰতৰ শক্তিশালী বন্ধুত্বপূৰ্ণ সম্পৰ্কৰ বাবেই এনেদৰে উচ্চ শিক্ষাৰ বাবে বড়ো ছাত্ৰ-ছাত্ৰীৰ দলটোৱে বড়োলেণ্ডলৈ আহিব পাৰিছে বুলি মন্তব্য কৰে ৷ “ভাৰত-বাংলাদেশৰ মাজৰ এনে বন্ধুত্বপূৰ্ণ সম্পৰ্কই শিক্ষা আৰু অৰ্থনীতিৰ অগ্ৰগতিত বিশেষ অৱদান আগবঢ়াব” - দৈমাৰীয়ে অনুষ্ঠানত সমবেত ৰাইজক কয় ৷



“বাংলাদেশত প্ৰায় দুই লাখ বড়ো, অসমীয়া, গাৰো আৰু অন্যান্য অসমৰ খিলঞ্জীয়া লোকে বসবাস কৰে ৷ আৰু সেই দুইলাখ লোকৰ বাবে বাংলাদেশত আছে এখন উন্নয়ন পৰিষদ ৷ বাংলাদেশত বসবাস কৰা বড়োসকলৰ মাজত আছে একতা”, এনেদৰে অনুষ্ঠানটোত বক্তব্য ৰাখে সাংসদ দৈমাৰীয়ে ৷

ছাত্ৰ-ছাত্ৰীৰ দলটোৱেও অসমলৈ আহি উচ্চ শিক্ষা গ্ৰহণ কৰিবলৈ সুবিধা লাভ কৰাত সুখী বুলি মন্তব্য কৰে ৷

উল্লেখযোগ্য যে বড়ো সমাজ, কোকোৰাঝাৰে ছাত্ৰ-ছাত্ৰীৰ দলটোৰ উচ্চ শিক্ষাৰ সকলো খৰচ বহন কৰিব ৷