চৰকাৰী বিভাগত চিকিৎসা বিলৰ কেলেংকাৰী! ৩৯ বিষয়া কৰ্মচাৰীৰ বিৰুদ্ধে গোচৰ ৰুজু

এইবাৰ ভুৱা ৰেফাৰেল আবেদনেৰে চিকিৎসা বিল সংগ্ৰহত নামিছে ৰাজ্যৰ একাংশ চৰকাৰী বিভাগৰ কৰ্মচাৰী।  বিত্ত, শিক্ষা আৰু শক্তি বিভাগৰ ৩৯গৰাকী বিষয়া-কৰ্মচাৰীৰ বিৰুদ্ধে উত্থাপিত হৈছে অভিযোগ।

তিনিওটা বিভাগৰ সৰ্বমুঠ ৩৯ বিষয়া কৰ্মচাৰীয়ে জালিয়াতিৰে দাখিল কৰিছে ৰেফাৰেল আবেদন ৷ ইয়াৰে শক্তি বিভাগৰ ৩৭ গৰাকী, শিক্ষা বিভাগৰ ২ গৰাকী, বিত্ত বিভাগৰ ১ গৰাকী ৷ নিয়ম অনুসৰি চৰকাৰী কৰ্মচাৰীয়ে স্বাস্থ্য বিভাগৰ অনুমতি সাপেক্ষে উভতাই পায় চিকিৎসা ব্যয় ৷ চিকিৎসা ব্যয় উভতাই পাবলৈ চিকিৎসা মহাবিদ্যালয়ৰ ৰেফাৰেল কমিটীয়ে প্ৰদান কৰিব লাগে অনুমতি ৷

পিছে চিকিৎসা মহাবিদ্যালয়ৰ অনুমতি অবিহনে একাংশ চৰকাৰী কৰ্মচাৰীয়ে নিজ ইচ্ছাত চিকিৎসা কৰে ব্যক্তিগত খণ্ডৰ চিকিৎসালয়ত ৷ যি ব্যয় হোৱা ধন উভতাই দিবলৈ দায়বদ্ধ নহয় ৰাজ্য চৰকাৰ ৷ পিছে, এই একাংশ চৰকাৰী কৰ্মচাৰীয়ে জালিয়তিৰ আশ্ৰয় লৈ বছৰৰ পিছত বছৰত জমা দি গৈছে ভুৱা ৰেফাৰেল প্ৰমাণপত্ৰ ৷ আৰু তেনে ভুৱা পত্ৰ জমা দিয়া ৩৯ বিষয়া কৰ্মচাৰীৰ বিৰুদ্ধে ভঙাগড় আৰক্ষী থানাত ৰুজু হৈছে গোচৰ ৷

GMCHৰ অধীক্ষকে দাখিল কৰিছে এজাহাৰ ৷ প্ৰশ্ন হৈছে, একোগৰাকী চৰকাৰী বিষয়া কৰ্মচাৰীয়ে ভুৱা প্ৰমাণ পত্ৰৰে দাখিল কৰিছে ৪ ৰ পৰা ১০ লাখ পৰ্য্যন্ত বিল ৷ অৰ্থাৎ ৩৯ বিষয়া কৰ্মচাৰীৰ প্ৰায় ৪ কোটিৰ অধিক কেলেংকাৰী সংঘটিত কৰাৰ সন্দেহ অভিযোগকাৰীৰ ৷ প্ৰশ্ন হৈছে ভুৱা ৰেফাৰেল প্ৰমাণ পত্ৰৰে আবেদন কৰা বিষয়া কৰ্মচাৰীসকলে ভুৱা ভাৱে উলিয়াইছিল নেকি স্বাস্থ্য বিল ৷ সেয়া হয়টো আৰক্ষীৰ সঠিক তদন্তত পোহৰলৈ আহিব!

অসমীয়াত ব্ৰেকিং নিউজ সৰ্বপ্ৰথম News18 অসমীয়াত| শেহতীয়া খবৰ, লাইভ নিউজ আপডেট. সবাতোকৈ বিশ্বাসযোগ্য অসমীয়া নিউজ ৱেবছাইট News18 অসমীয়া|