‘নৱেম্বৰ-ডিচেম্বৰৰ ভিতৰত ১৫ৰ পৰা ২৫ জন বিজেপি বিধায়কে যোগদান কৰিব কংগ্ৰেছ দলত’- বিস্ফোৰণ আৰ পি শৰ্মাৰ

অতি শীঘ্ৰে বিজেপি ত্যাগ কৰি কংগ্ৰেছ দলত যোগদান কৰিব কমেও ১৫ৰ পৰা ২৫ জন বিধায়কে।  অহা নৱেম্বৰ-ডিচেম্বৰ মাহৰ ভিতৰত কংগ্ৰেছত যোগদান কৰিব বিজেপিৰ বিধায়কসকলে। এই মন্তব্য কৰিছে তেজপুৰ লোকসভা সমষ্টিৰ প্ৰাক্তন সাংসদ তথা ন-কংগ্ৰেছী আৰ পি শৰ্মাই।

শুকুৰবাৰে ৰাহুল গান্ধীৰ জন্ম দিন উপলক্ষে গহপুৰ অসামৰিক চিকিৎসালয়ত বৃক্ষ ৰোপণৰ লগতে ৰক্তদান কাৰ্যসূচীৰ আয়োজন কৰা হয়। উক্ত কাৰ্যসূচীত অংশগ্ৰহণ কৰি সাংসদ তথা ন-কংগ্ৰছী ৰাম প্ৰসাদ শৰ্মাই এই মন্তব্য কৰে।

সাংবাদিকৰ প্ৰশ্নত আৰ পি শৰ্মাই কয় যে, ‘অতি শীঘ্ৰে বিজেপি দল ত‍্যাগ কৰি কংগ্ৰেছলৈ ২৫-১৫ বিধায়ক আহিব। নিৰ্বাচনৰ পূৰ্বে সলনি নহয় প্ৰদেশ কংগ্ৰেছৰ সভাপতি। বিজেপি দলৰ ভিতৰত এতিয়া ব্যাপক ক্ষমতা কেন্দ্ৰীক যুঁজ।’

‘মুখ্যমন্ত্ৰীও এতিয়া দুজন। এজন ঘোষিত মুখ্যমন্ত্ৰী আনজন অঘোষিত মুখ্যমন্ত্ৰী । কোৰোণাক লৈ বিজেপিয়ে ৰাজনীতি কৰিছে। কোৰোণা ভাইৰাছক ৰাজনৈতিক ভাইৰাছলৈ নিব বিচাৰিছে বিজেপিয়ে।’- এনেদৰে কয় প্ৰাক্তন সাংসদগৰাকীয়ে।