চাৰি মাহত কাজিৰঙালৈ আহিল ১ লাখ ৪০ হাজাৰ পৰ্যটক

News18 Assam | News18-Assam
Updated:February 22, 2021, 5:50 PM IST
চাৰি মাহত কাজিৰঙালৈ আহিল ১ লাখ ৪০ হাজাৰ পৰ্যটক
পৰ্যটন ক্ষেত্ৰখনত নতুনকৈ সংযোজন হোৱা নদী পৰ্যটনে পৰ্যটকৰ বিপুল সঁহাৰি লাভ কৰিছে বুলি প্ৰকাশ কৰিছে উদ্যান কৰ্তৃপক্ষই।

পৰ্যটন ক্ষেত্ৰখনত নতুনকৈ সংযোজন হোৱা নদী পৰ্যটনে পৰ্যটকৰ বিপুল সঁহাৰি লাভ কৰিছে বুলি প্ৰকাশ কৰিছে উদ্যান কৰ্তৃপক্ষই।

  • Share this:
কোভিডৰ পিছত যেন ক্ৰমাৎ ঠন ধৰি উঠিছে ৰাজ্যৰ পৰ্যটন উদ্যোগ‌। নিৰাশাৰ মাজতো আহিছে আশাৰ বতৰা। কোভিডৰ বাবে বিদেশী পৰ্যটক কাজিৰঙালৈ নাহিলেও দেশীয় তথা থলুৱা পৰ্যটকৰ ভিৰ পৰিলক্ষিত হৈছে বিশ্ব ঐতিহ্যক্ষেত্ৰ কাজিৰঙাত। উদ্যানখন মুকলি হোৱাৰ পৰা দেওবাৰৰ দিনটোলৈ অতিক্ৰম কৰিলে চাৰিমাহ।

চাৰিমাহত কাজিৰঙালৈ ভ্ৰমণৰ বাবে আহিল ১৪৩৮৮০ গৰাকী পৰ্যটক৷ ইয়াৰে ২৩৭ গৰাকী বিদেশী পৰ্যটক। এই সময়ছোৱাৰ ভিতৰত সংগ্ৰহ হোৱা ৰাজহৰ পৰিমাণ ২.৬৬ কোটি টকা। কোভিড মহামাৰীৰ ত্ৰাসৰ পাছত উদ্যান কৰ্তৃপক্ষই আশা কৰাতকৈ অধিক পৰ্যটকৰ আগমন ঘটিছে বুলি মত প্ৰকাশ কৰে উদ্যানৰ সঞ্চালক পি শিৱ কুমাৰে।

আনহাতে, পৰ্যটন ক্ষেত্ৰখনত নতুনকৈ সংযোজন হোৱা নদী পৰ্যটনে পৰ্যটকৰ বিপুল সঁহাৰি লাভ কৰিছে বুলি প্ৰকাশ কৰিছে উদ্যান কৰ্তৃপক্ষই। উল্লেখ্যে যে কাজিৰঙাৰ কঁহৰা, বাগৰি, আগৰাতলীৰ সমান্তৰালকৈ ভোমোৰাগুৰিৰ নদী পৰ্যটনত পৰ্যটকে ভিৰ কৰিছে। মন কৰিবলগীয়া যে মূলত বিদেশী পৰ্যটকৰ ওপৰত নিৰ্ভৰশীল কাজিৰঙাৰ পৰ্যটন উদ্যোগলৈ এইবাৰ ব্যাপক সঁহাৰি জনাইছে অসম তথা উত্তৰ–পূবৰ পৰ্যটকে। যি নিশ্চয়কৈ এক আশাৰ বতৰা বুলি প্ৰকাশ কৰে উদ্যানৰ ডি চি এফ কে এছ ডেকাৰজাই।

উল্লেখ যে, বিগত বৰ্ষত ‘কা’ আৰু কোৰোনাই ম্লান কৰি পেলাইছিল কাজিৰঙাৰ পৰ্যটন উদ্যোগ। পানীত হাঁহ নচৰা অবস্থাৰ সৃষ্টি হৈছিল কাজিৰঙাৰ পৰ্যটন উদ্যোগৰ লগত জড়িত হাজাৰ হাজাৰ পৰিয়াল। বিগত বৰ্ষৰ ২১ অক্টোবৰত ৰাজ্যৰ মুখ্যমন্ত্ৰী সৰ্বানন্দ সোণোৱালে ৰাষ্ট্ৰীয় উদ্যান পৰ্যটকৰ বাবে মুকলি কৰি দিয়াৰ পাছত হাঁহি বিৰিঙিছিল পৰ্যটনৰ লগত জড়িত থকা কাজিৰঙাৰ লোকসকলৰ। চলিত পৰ্যটন বৰ্ষত আশা ব্যঞ্জক পৰ্যটকৰ সঁহাৰি নাথাকিলেও পেটৰ ভাত মুঠি মোকলাবলৈ সক্ষম হৈছে কাজিৰঙাৰ পৰ্যটন ব্যৱসায়ীসকল।
Published by: Sanjay Kumar Das
First published: February 22, 2021, 5:50 PM IST
আৰু চাওক
পৰৱৰ্তী বাতৰি

শেহতীয়া বাতৰি